اسلام آباد۔ 14 مئی (اے پی پی) سٹیٹ بینک آف پاکستان (ایس بی پی) کوں بین الاقوامی مالیاتی فنڈ (آئی ایم ایف) دے توسیعی فنڈ سہولت پروگرام دے تحت 760 ملین اسپیشل ڈرائنگ رائٹس یعنی تقریباً 1.023 ارب امریکی ڈالر دی ݙوجھی قسط مل ڳئی اے ۔ سٹیٹ بینک توں جاری اعلامیہ موجب اے قسط آئی ایم ایف ولوں پاکستان دی اقتصادی کارکردگی تے اطمینان اتے پروگرام دے اہداف دے حصول دی روشنی اچ جاری کیتی ڳئی اے۔ ایں رقم دا مقصد پاکستان دے زرمبادلہ دے ذخیرے کوں بہتر بݨاوݨ تے ملکی معیشت دے استحکام اچ معاونت ݙیوݨ اے ۔اے رقم سٹیٹ بینک دے غیر ملکی زرمبادلہ دے ذخیرے اچ شامل کر ݙتی ویسی اتے اے ودھارا16 مئی 2025 کوں مکݨ آلے ہفتے دے ذخیرے اچ ظاہر تھیسی۔ ایں قسط دی وصولی نال سٹیٹ بینک دے ذخیرے اچ چنڳاں ودھارا متوقع اے جیڑھا ٻاہرلی ادائیگیاں دیاں ضرورتاں پوریاں کرݨ اتے مالیاتی استحکام کوں ودھاوݨ اچ مدد ݙیسی۔ سٹیٹ بینک ایں پیشرفت کوں پاکستان دی معیشت تے عالمی اعتماد دی علامت سمجھدے اتے توقع رکھیندے جو ایں نال نہ صرف مالیاتی پالیسی کوں تقویت ملسی بلکہ سرمایہ کاراں دے اعتماد اچ وی ودھارا تھیسی
