اسلام آباد۔ 14 مئی (اے پی پی) پاکستان پیپلز پارٹی دی رکن قومی اسمبلی شازیہ مری آکھیے جو ساݙی مسلح افواج بھارتی جارحیت تے دشمن کوں منہ بھن جواب ݙے تے ساݙے سر ماݨ نال اُچے کرݙتن ، پاکستان دیاں تریمتاں وی مادر وطن دے تحفظ سانڳے مسلح افواج دے مونڈھے نال مونڈھا رلا تے کھڑیاں ہوسن۔ قومی اسمبلی اچ اعتراض دے نکتے تے انہاں آکھیے قوم ہک واری ول جئیں عزم دا اظہار کیتے او قابل تحسین اے ایندے تے پوری قوم کوں مبارخ ݙیندوں ۔ ایں ایوان اچ ہر ہک محب وطن اے اتے پاکستان کیتے جذبہ رکھیندے۔ قوم ثابت کر ڈتے جو میلی اکھ نال ساݙے وطن کوں ݙیکھݨ آلیں کوں ھک مٹھ تھی تے جواب ݙتے، جنگ بندی چنڳاں اقدام اے، اساں جنگ نی چاہندے۔ پاکستان عالمی قوانین دی کوئی خلاف ورزی نی کیتی اتے سویلین کوں نشانہ نی بݨایا ۔ اساں انہاں سارے لوکاں کوں خراج تحسین پیش کریندوں، آرمڈ فورسز بہترین کردار ادا کیتے۔ بھارتی جارحیت تے انہاں دے حوصلے، عزم اتے مہارت کوں سلام پیش کریندوں۔ افواج پاکستان ساݙا سر ماݨ نال اچا کرݙتے۔ ایں ملک دے دفاع سانڳے پاکستان دیاں تریمتاں وی مونڈھے نال مونڈھا رلا تے کھڑیاں ہوسن۔ انہاں آکھیے اساں اپݨے دوست ملکاں، اقوام متحدہ اتے امریکہ دی جنگ بندی کیتے کوششاں دی وی تعریف کریندوں ۔ شہید بھٹو اتے بے نظیر بھٹو پاکستان دا دفاع ناقابل تسخیر بݨایا ۔ پہلگام واقعے دے بعد بغیر ثبوت دے انڈیا پاکستان تے الزام لاݙتا، ول بلا اشتعال جارحیت کیتی۔ انہاں دے جہازاں دی تباہی دا اعتراف ہݨ خود انہاں دا میڈیا وی کریندا پئے۔ بھارتی میڈیا زرد صحافت دی بدترین مثال قائم کیتی ہݨ اینکوں کچرا آکھیا ویندا پئے۔ ساݙے میڈیا ذمے واری دا مظاہرہ کیتے
