لاہور۔ 14 مئی (اے پی پی) پنجاب دے ودھ سارے علاقیاں اچ کل توں گھن تے 19 مئی تائیں گرمی ودھݨ اتے ہیٹ ویو دا اندیشہ ظاہر کیتا ڳئے، پی ڈی ایم اے وزیر اعلیٰ پنجاب دی ہدایت تے ضلعی انتظامیہ کوں الرٹ جاری کر ݙتے۔ ڈائریکٹر جنرل پی ڈی ایم اے عرفان علی کاٹھیا پورے صوبے دے کمشنرز اتے ڈپٹی کمشنرز کوں ہدایات جاری کریندیں ہوئیں آکھیا جو ضلعی انتظامیہ سودھے سارے متعلقہ محکمے متوقع ہیٹ ویو اتے موسمی صورتحال پاروں الرٹ رہن۔ محکمہ سکول ایجوکیشن، ہیلتھ، ٹرانسپورٹ، لوکل گورنمنٹ، ریسکیو 1122 اتے ٻئے متعلقہ محکمیاں کوں آکھیا ڳئے جو کل 15 توں 19 مئی تئیں پنجاب دے وݙے شہراں اتے میدانی علاقیاں اچ درجہ حرارت ودھݨ اتے ہیٹ ویو دے اندیشے ہن، جیندے نال آندے کجھ ݙینھاں اچ ودھ سارے علاقیاں دے درجہ حرارت اچ غیر معمولی ودھارا تھیوݨ دا وی امکان اے۔ ڈی جی پی ڈی ایم اے آکھیا جو 20 مئی تئیں درجہ حرارت 04 توں 07 ڈگری سینٹی گریڈ معمول توں ودھ رہݨ دا اندیشہ اے جڈانجو مغربی ہوائیں دا سلسلہ 19 مئی دی شام توں پنجاب اچ داخل تھیوݨ دے امکانات ہن، جیندے نال 19 توں 20 مئی وچال پنجاب دے ودھ سارے ضلعیاں اچ بارش دا وی امکان اے۔ ڈی جی پی ڈی ایم آکھیا جو انتظامیہ عوامی جاہیں تے صاف پاݨی دی فراہمی کوں یقینی بݨاوے۔ ہسپتالاں اتے موبائل ہیلتھ یونٹس اچ ہیٹ سٹروک بارے ابتدائی طبی امداد دی فراہمی یقینی بݨائی ونڄے، گرمی اتے لو دی شدت اچ ودھارے نال عوام وی محتاط رہن۔ ݙوپہر دے ویلھے کم کرݨ آلے لو توں بچن ۔ ہلکے رنگ دے کپڑے پاتے ونڄن، سر کڄ تے رکھن۔ ٻالاں اتے وݙیاں دا خاص خیال رکھیا ونڄے، غیر ضروری سفر نہ کیتا ونڄے۔ پرنٹ، سوشل اتے الیکٹرانک میڈیا دے ذریعے شہریاں کوں ہیٹ ویو بارے ݙسیا ونڄے۔ انہاں ٻیا آکھیا جو عوام کہیں وی ایمرجنسی اچ پی ڈی ایم اے ہیلپ لائن 1129 یا ریسکیو 1122 نال رابطہ کرِن۔
