ماسکو۔ 14 مئی (اے پی پی) چیئرمین سینیٹ سید یوسف رضا گیلانی دی ماسکو دی گرینڈ مسیت دے نائب مفتی روحجان آبیزوف نال ملاقات تھئی اتے بین المذاہب ہم آہنگی دے ودھارے تے تفصیلی ڳالھ مہاڑ تھئی۔ بدھ کوں سینیٹ سیکرٹریٹ توں جاری بیان موجب سید یوسف رضا گیلانی روس وچ مسلم کمیونٹی دی رہنمائی اتے مذہبی ہم آہنگی کوں ودھارا ڈیوݨ وچ مفتی اعظم دے اہم کردار تے پاکستان دے لوکاں اتے پارلیمنٹ ولوں نیک خواہشات دا اظہار کیتا۔ ملاقات اچ اڄوکے عالمی چیلنجز جیویں جو انتہا پسندی، دہشت گردی اتے اسلاموفوبیا دے مسئلیاں تے تفصیلی ڳالھ مہاڑ تھئی اتے ایں ڳالھ تے اتفاق کیتا ڳیا جو اے مسئلے عالمی سطح تے تنازعات دا سبب بݨدے پئن۔ چیئرمین سینیٹ زور ݙتا جو اسلام دا اصل سنیھا محبت، امن، شفقت اتے عالمی بھائی چارے دا اے۔ انہاں ہک عالمی اتحاد دی لوڑھ تے زور ݙتا جیندے اچ مذہبی علماء اتے ادارے شامل ہوون تاں جو اجتماعی دانش، بین المذاہب ہم آہنگی اتے جامع تعلیم نال ایں بیانیے کوں موثر طور تے اجاگر کیتا ونڄ سڳے۔ انہاں روس دے مختلف مذہبی اتے نسلی منظرنامے وچ رواداری کوں ودھارا ڈیوݨ اچ گرینڈ مسجد دی قیادت دی تعریف کیتی اتے پاکستان دی بین المذاہب مکالمے، تنوع پسندی اتے روحانی افہام و تفہیم کیتے وابستگی دا اعادہ کیتا۔ سید یوسف رضا گیلانی آکھیا جو بالاں کوں ابتدائی عمر اچ ای تعلیم تے تبلیغ نال زندگی دے اصل حقائق انسانیت، محبت، رواداری توں واقف کراوݨ ویلھے دی اہم لوڑھ اے۔ ݙوہیں فریقین ایں ڳالھ تے اتفاق کیتا جو اینجھے ویلے اچ جݙاں انتہا پسند نظریات اتے ثقافتی اجنبیت عالمی استحکام کوں خطرے اچ پیندے پئین، نینگر نسل دی بہتر تعلیم تے تربیت اتے اعتدال و اتحاد دی اقدار کوں ودھارا ݙیوݨ ضروری اے۔ ڈپٹی گرینڈ مفتی ݙسایا جو روس وچ 25 لکھ مسلمان پرامن زندگی گزریندے پئین اتے صدر پیوٹن خود بین المذاہب ہم آہنگی اتے ساری قوماں دے حقوق اچ دلچسپی رکھیندن ۔ سید یوسف رضا گیلانی پاکستان دی اسلامی نظریاتی کونسل اتے وݙے مفتی دے دفاتر وچال ادارہ جاتی رابطیاں دی تجویز ݙتی اتے علمی تبادلے، روحانی تعلیم اتے نینگراں تئیں رسائی جیویں جو مشترکہ اقدامات دی تجویز ݙتی تاں جو مشترکہ اقدار اتے باہمی احترام تے مبنی عالمی مسلم شناخت کوں ودھارا ݙتا ونڄ سڳے۔ چیئرمین سینیٹ دے نال روس اچ پاکستان دے سفیر خالد محمود جمالی، چیئرمین سینیٹ دے مالیاتی مشیر اعزاز خان اتے مقامی سفارتخانہ دے عملے دے ارکان موجود ہن۔
