وزیرِ اعظم دا وفاقی کابینہ دے ارکان نال پسرور چھاؤنی دا دورہ، “آپریشن بنیان مرصوص” اچ فوج دے جواناں دی بے مثال بہادری اتے پیشہ ورانہ مہارت دی تعریف
راولپنڈی۔14 مئی (اے پی پی) وزیرِ اعظم محمد شہباز شریف پسرو چھاؤنی، سیالکوٹ دا دورہ کیتے۔ اُنھاں دے نال نائب وزیرِ اعظم اتے وزیرِ خارجہ، وزیرِ دفاع، وزیرِ منصوبہ بندی و ترقی اتے وزیرِ اطلاعات وی موجود ہَن۔ اِیں دورے دا مقصد “معرکہ حق” دے تحت “آپریشن بنیان مرصوص” اچ فوج دے جواناں دی بے مثال بہادری اتے پیشہ ورانہ مہارت کوں خراجِ تحسین پیش کرݨ ہئی۔ آرمی چیف جنرل سید عاصم منیر اتے پاک فضائیہ دے سربراہ ائیر چیف مارشل ظہیر احمد بابر سدھو (نشانِ امتیاز ملٹری) وی اِیں موقع تے موجود ہَن۔
آئی ایس پی آر دے مطابق دورے اچ وزیرِ اعظم کوں “معرکہ حق” دی تفصیلات اتے کور دی موجودہ آپریشنل تیاریاں تے مفصل بریفنگ ݙتی ڳئی۔ وزیرِ اعظم “معرکہ حق” اچ پاک فوج دی شاندار کارکردگی دی تعریف کریندے آکھیا جو قوم دے اٹل عزم توں طاقت گِھن تے پاکستان دی دلیر فوج دھرتی ماء دا بہترین انداز اچ دفاع کیتے اتے دشمن دی بزدلانہ جارحیت دا فیصلہ کن جواب ݙتے۔ تاریخ ہمیشہ یاد رکھیسی جو کیویں کجھ گھنٹیاں اچ پاکستان دے محافظاں بھارت دی بلاجواز جارحیت کوں بے مثال مہارت اتے عزم نال مِٹی اچ رَلا ݙتا۔ محاذِ جنگ تے موجود افسران اتے جواناں نال ملاقات اچ وزیرِ اعظم اُنھاں دے اُچے حوصلے، بے مثال پیشہ ورانہ صلاحیتاں اتے مکمل تیاری کوں سراہیا۔ وزیرِ اعظم محمد شہباز شریف آکھیا جو پاکستان کوں آپݨے بہادر سپوتاں تے ماݨ اے، اے قوم دا ماݨ اتے وقار ہین۔ اُنھاں بے گناہ شہریاں جِنّھاں اچ ٻال، تِریمتیں اتے بزرگ شامل ہِن، تے جارحیت کوں شرمناک قرار ݙتے اتے آکھیے جو اُنھاں کوں دہشت گرد آکھݨ بین الاقوامی قوانین، اخلاقیات اتے ضابطیاں دے سراسر خلاف اے۔ وزیرِ اعظم واضح کیتے جو ساݙی غیر جانبدار تحقیقات دی پیشکش دے باوجود بھارت ڄاݨ بُجھ تے اِیندے توں پاسہ کیتے کیوں جو اُنھاں کولو کجھ ثابت کرݨ کوں کائناں ہئی۔ غرور، تکبر اتے کوڑے بہانیاں دی بنیاد تے جارحیت کیتی ڳئی، جِیندا ٻہوں مؤثر اتے دندان شکن جواب ݙتا ڳیا۔ وزیرِ اعظم آکھیا جو ساݙے شہید ساݙا ماݨ ہین اتے قوم اُنھاں دی قربانیاں کوں ہمیشہ یاد رکھیسی۔ دورے دے شروع اچ چیف آف آرمی سٹاف اتے کور کمانڈر گوجرانوالہ وزیرِ اعظم دا استقبال کیتا۔
