اسلام آباد۔14 مئی(اے پی پی)وزیرِ اعظم محمد شہباز شریف پاکستان دی خودمختاری اتے علاقائی سالمیت دا ہر قیمت تے دفاع کریندے جنوبی ایشیاء اچ امن دے ودھارے کیتے آپݨے مضبوط عزم دا اعادہ کریندے زور ݙتے جو اقوامِ متحدہ دی سلامتی کونسل دی قرارداداں دے مطابق جموں و کشمیر دے تنازعے دا منصفانہ حل جنوبی ایشیا اچ پائیدار امن کوں یقینی بݨاوݨ کیتے ٻہوں ضروری اے۔ وزیرِ اعظم محمد شہباز شریف اتے اقوامِ متحدہ دے سیکرٹری جنرل انتونیو گوتریسں وچال ٹیلیفونک رابطہ تھڑے جِیندے اچ جنوبی ایشیا دی صورتحال تے ڳالھ مُہاڑ کیتی ڳئی۔ پچھلے ݙو ہفتیاں اچ ݙوہیں رہنماواں وچال اے تریجھا ٹیلیفونک رابطہ ہئی۔ وزیرِ اعظم جنوبی ایشیاء دی کشیدہ صورتحال کوں گھٹ کرݨ کیتے سیکرٹری جنرل دی قیادت اتے سفارتی کوششاں کوں سراہیا۔ اُنھاں آکھیا جو سیکرٹری جنرل دی سفارتکاری اتے رابطے، اقوامِ متحدہ دے چارٹر دے اصولاں اتے مقاصد دے تحفظ دے نال نال جنوبی ایشیاء اچ امن دے حوالے نال اُنھاں دی دلچسپی دا مظہر ہِن۔ وزیرِ اعظم آکھیا جو پاکستان خطے اچ امن دے وݙے فائدے کیتے جنگ بندی تے اتفاق کیتے۔ وزیرِ اعظم پاکستان دی خودمختاری اتے علاقائی سالمیت دا ہر قیمت تے دفاع کریندے ہوئے جنوبی ایشیاء اچ امن دے ودھارے کیتے آپݨے مضبوط عزم دا اعادہ کیتے۔ وزیرِ اعظم بھارت دے دہشت گردی دے کوڑے الزامات اتے جارحیت دی مذمت کیتی اتے ایکوں ہِک خطرناک مثال قرار ݙیندے آکھیا جو عالمی برادری کوں اِیندا مناسب نوٹس گھِنݨا چاہیدے۔ اُنھاں بھارتی قیادت دے مسلسل اشتعال انگیز بیانات تے وی چنتا کیتے جِہڑے علاقائی امن کیتے خطرہ ہِن۔ اُنھاں اِیں ڳالھ تے زور ݙتا جو اقوامِ متحدہ دی سلامتی کونسل دی قرارداداں دے مطابق جموں و کشمیر دے تنازعے دا منصفانہ حل جنوبی ایشیا اچ پائیدار امن کوں یقینی بݨاوݨ کیتے ٻہوں ضروری اے اتے سیکرٹری جنرل تے زور ݙتا جو او اِیندے منصفانہ حل اچ آپݨا کردار ادا کرِن۔ سیکرٹری جنرل جنگ بندی دا خیرمقدم کریندے شہریاں دے جاناں دے ضیان تے پرچاوݨی ݙتی۔ اُنھاں علاقائی امن اتے استحکام کوں اڳو تے ودھاوݨ کیتے ݙوہیں فریقاں نال رابطے جاری رکھݨ دا عزم دوہرائے اتے آکھیے جو بین الاقوامی امن دے ودھارے کیتے کم کرݨ اُنھاں دا فرض ہے جِیندی دُنیا کوں لوڑھ ہے۔
