سیالکوٹ۔ 14 مئی (اے پی پی)وزیرِ اعظم محمد شہباز شریف آکھیا جو اساں امن اتے جنگ ݙوہیں کیتے تیار ہیں، مودی ساکوں بھاشن نہ ݙیوے، اساں حساب چُکتا کر ݙتے، پاݨی دے حق توں اساں دستبردار نئیں تھی سڳدے، اِیندا مُنہ توڑ جواب ݙیسوں۔ اے ڳالھ انہاں پسرور کینٹ اچ افواجِ پاکستان دے افسراں اتے جواناں نال خطاب کریندے آکھی۔ اِیں موقع تے نائب وزیرِ اعظم اتے وزیرِ خارجہ اسحاق ڈار، وزیرِ دفاع خواجہ محمد آصف، آرمی چیف جنرل سید عاصم منیر اتے ایئر چیف بابر ظہیر سدھو وی موجود ہَن۔ اُنھاں آکھیا جو عظیم فتح اتے کامیابی تے مبارکباد ݙینداں، اے کامیابی تاریخ اچ سنہری باب دے طور تے یاد رکھی ویسی، پاک فوج دے افسراں اتے جواناں پاکستان دے 24 کروڑ عوام دا وقار اُچا کیتا، اُنھاں اعلیٰ عسکری مہارت، ہمت اتے جوانمردی نال قیادت دی منصوبہ بندی تے عمل کیتا، کئی گُنا وݙا دشمن جیندا ارباں ڈالر دا جنگی ساز و سامان ڳھنݨ تے ناز، گھمنڈ اتے غرور ہئی جیکوں جواناں مِٹی اچ رَلا ݙتا اتے دشمن کوں مُنہ توڑ جواب ݙتا، اوکھے حالات اچ بہترین دفاع کیتا اتے دشمن کوں ہِک اِنچ وی اڳو تے ودھݨ نئیں ݙتا۔ اُنھاں آکھیا جو قوم دے عظیم پتراں دشمن دے ٹھکاݨیاں کوں تباہ کیتا، فضا اچ ساݙے شاہیناں جھپٹ جھپٹ تے دشمن دے طیاریاں کوں تباہ کیتا، اے کوئی معمولی کارنامہ نئیں۔ اُنھاں آکھیا جو بھارت اے سمجھدا ہئی جو روایتی جنگ اچ پاکستان اساں کولوں ٻہوں پِچُّھو رہ ڳئے ٻھل اِیں جنگ اچ ساݙے جواناں ثابت کر ݙتا جو روایتی جنگ اچ اساں بہترین مقابلہ کر سڳدے ہیں۔ اُنھاں آکھیا جو تکنیکی لحاظ نال جیویں جنگ لڑی ڳئی اے اِیں تے ماہرین ٻہوں لمبا عرصہ تئیں بحث کریندے رہ ویسن۔ اُنھاں آکھیا جو چیئرمین جوائنٹ چیفس آف سٹاف ساحر شمشاد مرزا، سپہ سالار جنرل سید عاصم منیر اتے پاک فضائیہ دے سربراہ ائیر مارشل بابر ظہیر سدھو اتے پاک بحریہ دے سربراہ ایڈمرل نوید اشرف اتے بری، بحری اتے فضائی افواج دے افسراں اتے جواناں کوں سلام پیش کرینداں اتے 24 کروڑ عوام ولوں مبارک ݙینداں۔ وزیرِ اعظم آکھیا جو بری فوج دے سربراہ جنرل سید عاصم منیر ٻہوں دلیری اتے دانشمندی نال جنگ دی منصوبہ بندی کیتی، میکوں اتے پوری قوم کوں اُنھاں تے ماݨ اے، اے قوم دے پُتر ہِن، پاک فضائیہ دے سربراہ ائیر مارشل بابر ظہیر سدھو دی قیادت اچ پاک فضائیہ اِیں جنگ اچ جدید ہتھیاراں اتے تکنیک دا عملی مظاہرہ کیتے، پاک بحریہ دے سربراہ ایڈمرل نوید اشرف دی قیادت اچ پاک بحریہ بہترین کارکردگی ݙکھائی، اے قوم دیاں اکھیں دے تارے ہین۔ شہباز شریف آکھیا جو عسکری قیادت اٹل عزم ݙکھائے، اُنھاں دشمن دا جرأت اتے بہادری نال اڳوں تے وَدھ تے مقابلہ کیتے، اِیںندے نال نہ صرف پوری قوم دا سِر ماݨ نال اُچا تھئے ٻھل ساݙے دُشمناں دے حواس ٹھکاݨے آ ڳئن اتے دوستاں دے حوصلے آسماناں نال ڳالھیں کریندے پِن، اے ساݙی وݙی کامیابی اے۔ اُنھاں آکھیا جو پاکستان بھارت توں 1971 دی جنگ دا بدلہ اِیں جنگ اچ گِھن گِھدے اتے پوری دُنیا کوں ݙس ݙتے جو پاکستان دی فوج ہِک جری فوج اے جیندا کوئی مقابلہ نئیں۔ اُنھاں آکھیا جو پوری قوم افواجِ پاکستان دی پِچھو کَھڑی اے، ڄیکر بھارت پاکستان دا پاݨی بند کرݨ دا سوچیا تاں اے ساݙی ریڈ لائن اے اتے ایندے تے کوئی سمڄھوتہ نا کیتا ویسی، پاݨی ساݙا حق ہے، اساں اِیندا بھرپور ردِعمل ݙیساں، 1960 دے سندھ طاس معاہدے بارے اچ کݙاہیں نہ سوچݨا، تنازعہ کشمیر کوں اقوامِ متحدہ دیاں قرارداداں دے مطابق حل کیتا ون٘ڄے اتے وَل تجارت کرے، صرف تجارت نئیں مربوط اتے جامع مذاکرات ہووݨے چاہیدن، اِیندے بغیر مِٹھا مِٹھا ہپ ہپ اساں نا تھیوݨ ݙیسوں۔ دہشت گردی تے مذاکرات بارے اُنھاں آکھیا جو مودی ݙسے 1971 اچ مکتی باہنی کوں تربیت کئیں ݙتی اتے اُنھاں کوں بھارت توں اِیں پار بھیڄیا اتے بغاوت تے اُکسایا، سمجھوتہ ٹرین تے حملہ کئیں کیتا؟ اے پوری دُنیا چنگاں ڄاݨدی اے، بلوچستان اچ حالیہ ہفتیاں اچ ٹرین کوں ہائی جیک کرݨ دا افسوسناک واقعہ تھیا، اِیندے اچ بی ایل اے، ٹی ٹی پی ملوث ہِن اتے اِیندے تانے بانے بھارت نال رَلدن، ساکوں بھاشن نہ ݙیو، دہشت گردی دے خلاف جنگ اچ 90 ہزار پاکستانیاں آپݨیاں جاناں قربان کیتیاں ہِن، اساں کوں 150 ارب ڈالر دا معاشی نقصان تھیا، اے ساݙی بقاء دی جنگ اے اتے اساں سارے رَل تے آپݨے مُلک توں دہشت گردی دا ہمیشہ ہمیشہ کیتے خاتمہ کریسوں، اِیں دہشت گردی دے پِچھوں کلبھوشن کون اے، او کِتھوں بلوچستان آیا، او کِیندی جاسوسی کریندا پیا ہئی؟ اُنھاں آکھیا جو پاکستان امن پسند مُلک اے، اساں اِیں خطے وِچ امن، خوشحالی اتے ترقی چاہندے ہئیں ٻھل ساݙی امن دی خواہش کوں کݙاہیں کمزوری نہ سمجھݨا، کہیں غلط فہمی دا شکار نہ تھیوݨا۔ اُنھاں آکھیا جو بھارت دا خطے دا تھانیدار بݨݨ دا خواب مِٹی وِچ رَل ڳئے، اساں پہلگام واقعے دی شفاف تحقیقات تے زور ݙتا اتے ہݨ وی اِیندے کیتے عالمی کمیشن دی تشکیل دی تجویز ݙیندے پئے ہیں جیندے اچ باہمی اتفاق نال جِہڑے مُلک شامل ہوون، اُنھاں توں تحقیقات کرائی ون٘ڄن، پاکستان ہر ممکن تعاون کریسی ٻھل بھارت ساݙی سنجیدہ اتے پُر خلوص پیشکش دا جواب پاکستان تے رات دے اندھارے اچ حملہ کر تے ݙتا، معصوم ٻالاں کوں شہید کیتا ڳیا، مودی اُنھاں کوں دہشت گرد آھدے، او پہلے آپݨے گریبان اچ جھاتی مارے، اُنھاں کوں خُدا دا خوف ہووݨا چاہیدے۔ اُنھاں آکھیا جو اساں دہشت گردی دے خلاف ہِک مُٹھ ہیں ٻھل دہشت گردی دی اݙ اچ تُساں پاکستان اچ افراتفری پیدا کرݨ چاہندے ہائو اتے اے وی چاہندے ہو جو افواجِ پاکستان کوں مغربی سرحداں توں ہٹا تے مشرقی سرحد تے لایا ون٘ڄے تاں اے تُہاݙی وݙی غلط فہمی اے، ساݙی فوج دہشت گرداں دے خلاف ݙینھ رات ردھی ہوئی اے، اتے اُنھاں خوارج کوں جہنم پُچیندی پئی اے۔ اُنھاں آکھیا جو ساݙے شاہیناں کیویں رافیل کوں فیل کر ݙتے، مودی سُݨ گھِنے ڄیکر وَل اے حرکت کیتی تاں مُنہ دی کھاسی، اساں تیار ہیں اتے ڄیکر وَل حملے دا سوچیا تاں بھارت اچ جِہڑا کجھ بچئے او وی ختم تھی ویسی، اساں امن دے داعی ہیں، آؤ رَل تے اِیں خطے کوں امن دا گہوارہ بݨاؤں، ٻھاء نہ لاؤ ہتھو ایکوں ٻڄھائو، پاکستان تاقیامت قائم و دائم رہ ویسی، بھارت نے کشمیر اتے پاݨی دے معاملے تے عوام کوں بے وقوف بݨا تے رکھیے، بھارت نیلم جہلم پن بجلی منصوبے کوں نقصان پُچاوݨ دی کوشش کیتی ٻھل زیادہ نقصان نئیں تھیا، جیکر زیادہ نقصان تھیندا تاں اساں بگلیہار ڈیم سودھا بھارت دے ٻئے آبی ذخائر کوں تباہ کر ݙیندے، اساں صبر اتے تحمل ݙکھائے، بھارت اِیں صبر اتے ویلے توں فائدہ چاوے اتے قوم کوں ٻیا دھوکہ نہ ݙیوے، اساں امن اتے جنگ ݙوہیں کیتے تیار ہئیں۔
