مُہاڑ اسلام آباد۔14 مئی (اے پی پی)وزیرِ اعظم محمد شہباز شریف آکھیے جو پاکستان ہِک امن پسند مُلک اے اتے اِیں جذبے دے تحت بھارت دے نال جنگ بندی تے رضامندی ݙکھائی اے، پاکستان مستقبل اچ کہیں وی جارحیت دا سامݨا کرݨ اتے آپݨی خودمختاری اتے علاقائی سالمیت دے دفاع کیتے تیار اے۔ وزیرِ اعظم محمد شہباز شریف نال جمہوریہ آذربائیجان دے سفیر خضر فرہادوف وزیرِ اعظم ہاؤس اچ ملین۔ ملاقات اچ وزیرِ اعظم جنوبی ایشیاء اچ حالیہ کشیدگی اچ پاکستان دے نال اٹل یکجہتی اتے حمایت تے صدر الہام علییوف دے نال نال آذربائیجان دے برادر عوام دا دِل دی گہرائی نال شکریہ ادا کیتا۔ وزیرِ اعظم آکھیا جو اے ݙوہیں مُلکاں وچال پائیدار دوستی دا عکاس اے۔ ’’آپریشن بنیان مرصوص‘‘ دی کامیابی تے پاکستان دی بہادر مسلح افواج کوں دِل دی گہرائی نال سراہیندے وزیرِ اعظم آکھیا جو پاکستانی عوام اِیں تاریخی فتح تے اللہ تعالیٰ دے شکر گزار ہِن۔ اُنھاں آکھیا جو پاکستان ہِک امن پسند مُلک اے اتے اِیں جذبے دے تحت بھارت دے نال جنگ بندی تے آمادگی ظاہر کیتی اے ٻھل پاکستان مستقبل اچ کہیں وی جارحیت دا سامݨا کرݨ، آپݨی خودمختاری اتے علاقائی سالمیت دے دفاع کیتے تیار اے۔ پاکستان آذربائیجان تعلقات بارے وزیرِ اعظم ݙوطرفہ تعاون اچ مثبت پیش رفت تے اطمینان کیتے۔ اُنھاں آکھیا جو صدر الہام علییوف دا پچھلے جولائی اچ پاکستان دا تاریخی دورہ، معیشت، تجارت اتے سرمایہ کاری دے شعبیاں اچ تعاون دا ہِک اہم سنگِ میل اے۔ فروری 2025 اچ آپݨے دورہ باکو دا ݙسیندے وزیرِ اعظم برادرانہ تعلقات کوں ہِک ٻئے کیتے فائدہ مند اقتصادی شراکت داری اچ بدلݨ دی پاکستان دی مضبوط خواہش دا اعادہ کیتا۔ سفیر خضر فرہادوف وزیرِ اعظم اتے پوری پاکستانی قوم کوں دِل دی گہرائی نال مبارکباد ݙتی۔ اُنھاں جنوبی ایشیاء اچ امن کیتے پاکستان دی کوششاں کوں سراہیا۔ اُنھاں آکھیا جو صدر الہام علییوف ݙوہیں مُلکاں وچال برادرانہ تعلقات کوں ٻہوں اہمیت ݙیندن۔ ݙوہیں مُلکاں دی قیادت وچال دستخط شدہ مفاہمت تے عمل درآمد اچ پیش رفت بارے الیندے اُنھاں وزیرِ اعظم کوں ݙوہیں دوست مُلکاں وچال سانجھے فائدے دے سارے شعبیاں اچ تعاون ودھاوݨ کیتے آپݨے مکمل عزم دا یقین ݙیوایا۔
