اسلام آباد۔14 مئی(اے پی پی)وزیرِ اعظم محمد شہباز شریف افہام و تفہیم دی فضاء برقرار رکھݨ دے عزم ݙکھیندے آکھیا جو پاکستان جنوبی ایشیا اچ امن چاہندے، سندھ طاس معاہدے کوں کݙاہیں چیلنج نا تھیوݨ ݙیسوں، پچھلے ہِک سال اچ پاکستان اتے متحدہ عرب امارات وچال ݙوطرفہ تعاون خاص کر معیشت اتے سرمایہ کاری دے شعبیاں اچ وَدھ بہتری آئی اے۔ وزیرِ اعظم محمد شہباز شریف اتے متحدہ عرب امارات دے صدر اتے ابوظہبی دے حکمران شیخ محمد بن زید النہیان بدھ کوں ٹیلی فون تے ڳالھ مُہاڑ کیتی۔ وزیرِ اعظم جنوبی ایشیا اچ حالیہ بحران کوں گھٹ کرݨ کیتے متحدہ عرب امارات دی سفارتی کوششاں اتے تعمیری کردار کیتے دِل دی گہرائی نال شکریہ ادا کیتا۔ اُنھاں آکھیا جو متحدہ عرب امارات ہمیشہ پاکستان دے نال کَھڑا رہے۔ وزیرِ اعظم آکھیا جو پاکستان جنوبی ایشیا اچ امن چاہندے اتے اِیں جذبے دے تحت بھارت دے نال جنگ بندی مفاہمت تے رضامندی ظاہر کیتی اے۔ اُنھاں افہام و تفہیم دی فضاء برقرار رکھݨ کیتے پاکستان دے عزم دا اعادہ کیتا اتے آکھیا جو پاکستان دی خودمختاری اتے علاقائی سالمیت دا ہر قیمت تے دفاع کیتا ویسی، پاکستان سندھ طاس معاہدے کوں کݙاہیں چیلنج نا تھیوݨ ݙیسی۔ وزیرِ اعظم پاکستان اتے متحدہ عرب امارات وچال گرم جوش، قریبی اتے برادرانہ تعلقات دا ذکر کریندے آکھیا جو پچھلے ہِک سال اچ ݙوہیں دوست مُلکاں وچال ݙوطرفہ تعاون خاص کر معیشت اتے سرمایہ کاری دے شعبیاں اچ وَدھ بہتری آئی اے۔ اُنھاں پاکستان اتے متحدہ عرب امارات دے تعلقات کوں ہِک ٻئے کیتے فائدہ مند اقتصادی شراکت داری اچ بدلݨ دے عزم دا اعادہ کیتا۔ متحدہ عرب امارات دے صدر امن کیتے پاکستان دی کوششاں کوں سراہیندے جنگ بندی مفاہمت دا خیرمقدم کیتا۔ اُنھاں آکھیا جو متحدہ عرب امارات جنوبی ایشیا اچ امن اتے استحکام دی بحالی دی حمایت کریندے۔
