ملتان۔ 15 مئی (اے پی پی) پروونشل ڈیزاسٹر مینجمنٹ اتھارٹی (پی ڈی ایم اے) پنجاب درجہ حرارت اچ ودھارے تے ہیٹ ویو الرٹ جاری کر ݙتا۔ ترجمان پی ڈی ایم اے سارے ضلعیاں دی انتظامیہ کوں الرٹ رہݨ دی ہدایت کریندیں ہوئیں آکھیا جو 15 توں 20 مئی تائیں درجہ حرارت معمول توں 4 توں 7 ڈگری سینٹی گریڈ تائیں ودھ رہݨ دا امکان اے۔ ملتان اچ سب توں ودھ درجہ حرارت 27 مئی 2010 کوں ریکارڈ کیتا ڳیا جیڑھا 51 ڈگری سینٹی گریڈ ہئی جئیں 54 سالہ پراݨا ریکارڈ ٻھن ݙتا جݙاں 27 مئی کوں درجہ حرارت 50 ڈگری سینٹی گریڈ تائیں پُڄ ڳیا۔ ایں توں پہلے 1956 اچ درجہ حرارت تقریباً 49 ڈگری سینٹی گریڈ (120 ڈگری فارن ہائیٹ) ریکارڈ کیتا ڳیا ہئی۔ معروف طبی ماہر ڈاکٹر فرحان اختر اے پی پی نال ڳالھ مہاڑ کریندیں ہوئیں آکھیا جو درجہ حرارت اچ ودھارے تے ہیٹ ویو اچ سن سٹروک دا خطرہ ہوندے جئیں توں بچݨ کیتے سر کڄ تے رکھݨ ضروری اے، نبو دا استعمال ودھ کیتا ونڄے تاں جو جسم اچ نمکیات دی ڳھٹکی نہ تھیوے۔ ایں موقع تے لیڈی ڈاکٹر فریحہ فرحان آکھیا جو امراضِ قلب دے شکار مریضاں تے وَݙے لوکاں کوں خاص طور تے ایں موسم اچ خاص احتیاط کرݨی چاہیدی اے۔
