وزیراعظم شہباز شریف دا آذربائیجان دے صدر کوں ٹیلی فون، بھارت نال اڄوکی کشیدگی وچال پاکستان نال یکجہتی تے شکریہ ادا کیتا

اسلام آباد۔15 مئی (اے پی پی) وزیر اعظم محمد شہباز شریف آذربائیجان ولوں پاکستان نال بھرپور یکجہتی تے حمایت تے صدر الہام علیوف دا شکریہ ادا کریندیں ہوئیں آکھیا جو پاکستان تے آذربائیجان ہمیشہ سچے بھراواں وانڳ ہک ٻئے نال کھڑے ریہن۔ خمیس کوں وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف جمہوریہ آذربائیجان دے صدر الہام علیوف کوں ٹیلی فون کیتا اتے جنوبی ایشیا دے اڄوکے بحران اچ آذربائیجان ولوں بھرپور یکجہتی تے حمایت تے صدر الہام علیوف دا شکریہ ادا کیتا۔ انہاں آکھیا جو صدر الہام علیوف دی مستقل حمایت پاکستانی عوام نال انہاں دی بے پناہ محبت تے پیار دا ہک ٻیا مظہر اے۔ وزیراعظم پاکستان نال اظہار یکجہتی تے آذربائیجان دی برادر عوام دا وی شکریہ ادا کیتا۔ انہاں آکھیا جو ہک واری ول ݙوہاں ملکاں وچال پائیدار تے دوستی دا اظہار تھیے، پاکستان تے آذربائیجان دی عوام ہمیشہ سچے بھراواں وانڳ ہک ٻئے نال کھڑے ریہن۔ وزیراعظم زور ݙتا جو پاکستان علاقائی امن کیتے بھارت نال جنگ بندی مفاہمت تے اتفاق کیتے اتے ایں کوں برقرار رکھݨ کیتے پرعزم اے۔ وزیراعظم محمد شہباز شریف بھارتی قیادت دے اڄوکء اشتعال انگیز بیانات تے اپݨی تشویش دا اظہار کریندیں ہوئیں اعادہ کیتا جو مستقبل اچ کہیں وی جارحیت دا سامݨا کرݨ کیتے پاکستان اپݨی خودمختاری تے علاقائی سالمیت دا بھرپور دفاع کریسی۔ وزیراعظم محمد شہباز شریف زور ݙتا جو جموں و کشمیر دا تنازعہ جنوبی ایشیا اچ عدم استحکام دی بنیاد اے جینکوں اقوام متحدہ دی سلامتی کونسل دیاں قرارداداں دے مطابق حل کیتا ونڄݨا چاہیدے۔ وزیراعظم محمد شہباز شریف کشمیر کاز کیتے پاکستان دی اصولی حمایت تے صدر علیوف دا شکریہ ادا کیتا۔ وزیراعظم پاکستان آذربائیجان وچال خصوصی تے وقت دی آزمائش تے پورا لہݨ آلے برادرانہ تعلقات تے روشنی پیندیں ہوئیں آکھیا جو پاکستان ایں دوستی کوں آپسی طور تے فیدہ مند اقتصادی سانجھے داری اچ بدلݨ کیتے پوری طرح پرعزم اے۔ انہاں پاکستان دے مختلف شعبیاں اچ آذربائیجان ولوں 2 ارب ڈالر دی سرمایہ کاری بارے تجاویز کوں چھیکڑی شکل ݙیوݨ کیتے تھیوݨ آلی پیش رفت تے اطمینان دا اظہار کیتا۔ انہاں صدر الہام علیوف کوں جلدی پاکستان دا سرکاری دورہ کرݨ دی دعوت ݙتی جیڑھی صدر الہام علیوف قبول کر گھدی۔ صدر علیوف پاکستان دی شاندار جت تے وزیراعظم کوں مبارخ ݙتی۔ انہاں امن کیتے پاکستان دیاں کوششاں دی تعریف کریندیں ہوئیں جنگ بندی مفاہمت دا خیرمقدم کیتا۔ انہاں اعادہ کیتا جو آذربائیجان پاکستان نال سارے شعبیاں اچ آپݨے برادرانہ تعلقات کوں مضبوط بݨاوݨ کیتے پرعزم اے۔