اسلام آباد۔ ١٦ مئی (اے پی پی) وفاقی وزیر برائے مذہبی امور سردار محمد یوسف آکھیا جو پاکستان کوں ایں سال سعودی حکومت دی طرفوں 1,79,210 دا حج کوٹہ ݙتا ڳیا ہا جیندے اچ ٥٠ فیصد سرکاری اتے ٥٠ فیصد پرائیویٹ سیکٹر کوں مختص کیتا ڳیا۔ جمعہ کوں سینیٹ دے اجلاس اچ انہاں آکھیا جو سعودی حکومت دی ہدایات دے مطابق ١٤ فروری ٢٠٢٥ تک سارے حج کمپنیز (سرکاری تے نجی) کوں مشاعر، خدمات (طوافع) اتے ٻئے اخراجات کیتے ادائیگی مکمل کرݨی ہئی جنہاں کمپنیاں ویلھے تے ادائیگیاں کیتیاں، انہاں دے عازمین دا اندراج سعودی پورٹل تے تھی ڳیا جݙاں جو ٻئے لوکاں دا کوٹہ ختم تھی ڳیا۔ اے صورتحال صرف پاکستان تک محدود نہیں بلکہ پوری دنیا توں تریہیں توں ساݙھے تریہیں لکھ عازمین کوں اے مسئلہ پیش اے۔ سردار محمد یوسف آکھیا جو جیویں ہی اے معاملہ وزیراعظم دے علم اچ آیا، انہاں ذاتی طور تے سعودی حکام نال ملاقات کیتی اتے درخواست کیتی جو تاریخ اچ توسیع ݙتی ونڄے تاں جو ٻئے پاکستانی عازمین فریضہ حج ادا کر سڳن۔ ایں اپیل تے ٢١ فروری تک ودھارا ݙتا ڳیا جیندے اچ ١٣,٦٠٠ لوکاں ادائیگیاں مکمل کیتیاں۔ بعد اچ، پاکستان دی مسلسل کوششاں تے سعودی حکومت ٻئے ١٠,٠٠٠ لوکاں دا اضافی کوٹہ ݙتا جیندے اچوں ٢٣ توں ٢٥ ہزار دے نیڑے عازمین ادائیگیاں مکمل کر گھدیاں۔ ایں طرحاں ہݨ تک تقریباً ١,١٥,٠٠٠ پاکستانی عازمین کوں حج دی اجازت مل ڳئی اے۔ وزیر واضح کیتا جو جیہڑے ٦٥ ہزار عازمین باقی رہ ڳئے ہن، انہاں کیتے وی حکومت مسلسل کوشش کریندی پئی اے۔ میں خود ݙو واری سعودی عرب ڳیاں اتے ملاقاتاں دے بعد متعلقہ حکام کوں ٻیا خط لکھ تے اپیل کیتی اے جو انہاں پاکستانیاں کوں وی موکل ݙتی ونڄے جنہاں دے پیسے جمع ہن اتے سارے تقاضے مکمل تھی ڳئن۔ انہاں ایں تاثر کوں رد کیتا جو حکومت ویلھے تے اطلاع نئی ݙتی۔ اساݙے کنے مکمل ریکارڈ موجود اے، سارے نجی حج کمپنیاں کوں تاریخ وار خطوط بھیڄے ڳئے اتے ولا ولا یاد دہانی کرائی ڳئی جو سعودی حکومت دی مقررہ ٹائم لائنز دا احترام کیتا ونڄے۔ وفاقی وزیر زور ݙتا جو حکومت ہݨ وی سنجیدگی نال سعودی حکومت نال رابطے اچ اے تاں جو انہاں ٦٥ ہزار پاکستانی عازمین کیتے راہ کڈھیا ونڄ سڳے۔
