اسلام آباد۔ ١٦ مئی (اے پی پی) وفاقی وزیر داخلہ محسن نقوی آکھیا جو بھارتی جارحیت دے خلاف شاندار جت تے اللہ تعالیٰ دے حضور سجدہ شکر ادا کریندوں۔ وطن دے شہیداں کوں سلام جنہاں دی بے مثال قربانیاں پاروں معرکہ حق اچ فتح نصیب تھئی، بزدل دشمن ہمیشہ وانڳ ایں واری وی رات دے اندھارے اچ حملہ کیتا۔ یوم تشکر تے اپݨے سنیھے اچ وزیر داخلہ محسن نقوی آکھیا جو پاکستان دے بہادر سپوتاں دشمن کوں عبرتناک سبق سکھا تے شکست فاش ݙتی۔ طاقت دے گھمنڈ اچ مست دشمن چند گھنٹیاں بعد ای میدان چھوڑ تے بھڄ ڳیا۔ پاکستان دے شاہیناں ٦ بھارتی طیاریاں کوں مٹی اچ رلا تے فضائی جنگ اچ نویں تاریخ رقم کیتی۔ پاکستان دی جری مسلح افواج دشمن کوں سلھ دا جواب پتھر نال ݙے تے عظیم کامیابی دا سنہرا باب رقم کیتا۔ محسن نقوی آکھیا جو افواج پاکستان دے نال خوددار اتے باوقار پاکستانی قوم دی فتح اے جیندے تے ہر پاکستانی دا سر فخر نال اُچا اے۔ آرمی چیف جنرل سید عاصم منیر، چیف آف ایئر سٹاف ظہیر احمد بابر اتے پاک بحریہ دے سربراہ ایڈمرل نوید اشرف کوں خراج تحسین پیش کرینداں۔ ترائیں سروسز چیفس دی دانشمندانہ اتے جراتمندانہ قیادت اچ بہادر سپوتاں دشمن دے مذموم عزائم کوں مٹی اچ رلا ݙتا۔
