اسلام آباد۔16 مئی (اے پی پی) وزیر اعظم محمد شہباز شریف برآمدات اتے سرمایہ کاری دے ودھارے کیتے تاریخی قدم چیندیں ہوئیں درآمدی محصولاں (ٹیرف) وچ بتدریج پر نمایاں گھٹکی دی منظوری ݙے ݙتی ہے اتے آکھیا جو حکومت مضبوط معیشت دے حصول، روزگار دے موقع ݙیوݨ اتے مہنگائی مکمل خاتمے کیتے کوئی کسر نہ چھڑیسی۔ وزیر اعظم آفس دے میڈیا ونگ ولوں جمعہ کوں جاری بیان موجب وزیر اعظم محمد شہباز شریف اے ڳالھیں آپݨی صدارت اچ نیشنل ٹیرف پالیسی بارے اہم اجلاس اچ آکھی جیڑھا جمعے کوں وزیراعظم ہاؤس اچ تھیا۔ بیان موجب اجلاس وچ برآمدات اتے سرمایہ کاری دے ودھارے کیتے درآمدی محصولاں اچ نمایاں ڳھٹکی دا فیصلہ کیتا ڳیا۔ اجلاس اچ وزیرِ اعظم عزم کیتا جو حکومت مضبوط معیشت دے حصول، روزگار دے موقع ݙیوݨ اتے مہنگائی دے مکمل خاتمے کیتے کوئی کسر نہ چھڑیسی۔ انہاں آکھیا جو ملکی اتے غیر ملکی ماہرینِ معیشت نال مشورے دے بعد بنیادی معاشی اصلاحات کیتے ہک جامع منصوبہ ٻݨا ݙتا ڳئے۔ بیان موجب آپݨے ایں معاشی بحالی دے منصوبے دے تسلسل اچ، وزیر اعظم ہک تاریخی قدم چیندیں ہوئیں درآمدی محصولاں (ٹیرف) وچ بتدریج پر نمایاں گھٹکی دی منظوری ݙے ݙتی ہے۔ ایں قدم کوں معاشی بہتری دے حصول آلے پاسے ہک اہم سنگِ میل قرار ݙتا ویندا پئے جیہڑا برآمدات تے مبنی ترقی کوں ممکن بݨیسی۔ ایں فیصلے نال نہ صرف بے روزگاری تے قابو پاوݨ وچ مدد ملسی بلکہ مہنگائی دی شرح کوں وی قابو وچ رکھیا ونڄ سڳسی۔ بیان وچ ݙسایا ڳیا جو وزیر اعظم ودھیکی کسٹمز ڈیوٹی (جیہڑی ایں ویلھے 2 فیصد توں 7 فیصد وچال اے) اتے ریگولیٹری ڈیوٹی (جیہڑی ایں ویلھے 5 فیصد توں 90 فیصد تئیں اے) کوں اگلے چار توں پنج سال اچ مکمل طور تے ختم کرݨ دی ہدایت کیتی اے۔ ایندے نال نال انہاں کسٹمز ڈیوٹی کوں ودھ توں ودھ 15 فیصد تئیں محدود کرݨ دے حق اچ فیصلہ کیتے، جݙاں جو فی الحال بعض اشیاء تے اے شرح 100 فیصد توں وی ودھ اے۔ وزیر اعظم ایں تجویز دے سارے پہلوواں دا بغور جائزہ گھدا، ٹیرف وچ گھٹائی نہ صرف جاری کھاتے دے خسارے کوں مستحکم کریسی بلکہ کسٹمز ڈیوٹی توں زیادہ محصولات حاصل کرݨ اچ وی مددگار ثابت تھیسی۔ بیان وچ ݙسایا ڳیا جو اجلاس اچ وزیر اعظم ہک عمل درآمد کمیٹی وی ٻݨا ݙتی اے۔ اجلاس اچ وفاقی وزیر تجارت جام کمال خان، وفاقی وزیر اقتصادی امور احد خان چیمہ، وفاقی وزیر خزانہ تے محصولات محمد اورنگزیب، وفاقی وزیر پیٹرولیم علی پرویز ملک، وزیر اعظم دے معاون خصوصی ہارون اختر اتے متعلقہ اداریاں دے اعلیٰ افسر شریک تھیے۔
