اسلام آباد۔16مئی(اے پی پی)چیئرمین سینیٹ سید یوسف رضا گیلانی آکھیے جو بھارت دی کھلی جارحیت اتے اشتعال انگیزی دے خلاف پاکستان دی شاندار کامیابی تے اڄ اللہ دا شکر ادا کریندے ہیں، مسلح افواج دشمن کوں اوندی زبان اچ ولدا ݙتے جیڑھا عسکری تاریخ اچ ہک نواں باب اے۔ یوم تشکر سانڳے سنیہے اچ انہاں آکھیا جو 6 اتے 7 مئی دی وچلی رات بھارت بزدلی ݙکھیندے پاکستان تے حملہ کیتے جیندے نال معصوم اتے بے گناہ پاکستانی شہری شہید تھئین اتے ساکوں انہاں بے گناہ شہریاں کیتے جوابی کارروائی تے مجبور کرݙتے۔ انہاں آکھیا جو ڄڳ ݙٹھے جو آپݨے توں کئی گنا وݙے دشمن کوں ڳوݙے ٹیکواوݨ اچ کڄھ ہی ڳھنٹے لڳین، دشمن دا غرور طیارے سوا تھی چکین جو ساݙے شاہیناں دشمن تے کاری ضرب لائی، ساݙی بہادر اتے پیشہ ورانہ مسلح افواج دشمن کوں اوندی زبان اچ ولدا ݙتے اتے دشمن دے عزائم ناکام ٻݨائن۔سید یوسف رضا گیلانی آکھیا جو ساݙی اے کارروائی ایں بوسیدہ نظریہ دے خلاف ھئی جیڑھی انسان دشمنی، جارحیت، مذہبی جنون اتے تعصب تے قائم اے، اے ساݙی غیرت اتے اصولاں دی فتح اے، اے افواج پاکستان دے نال نال خوددار، غیرت مند اتے باوقار پاکستانی قوم دی کامیابی اے، پوری قوم سیسہ پلائی دیوار آلی کار مسلح افواج دے نال کھڑی اے، پاک افواج دے شہداء کوں خراج عقیدت پیش کرینداں جنہاں معرکہ حق سانڳے اپݨیاں جاناں ݙتن، میں اپݨی قوم مسلح افواج خاص کر چیف آف ایئر سٹاف ظہیر بابر اتے انہاں دے شاہیناں کوں وی مبارک ݙینداں جنہاں ساݙا سر ماݨ نال اچا کیتے اتے اڄ پاکستان ہک ذمہ دار ریاست ٻݨ تے ڄڳ دے سامݨے کھڑے۔
