سیالکوٹ۔17 مئی (اے پی پی) وزیر دفاع خواجہ محمد آصف آکھیے جو ایں اچ کوئی شک کائنی جو ساݙی 78 سالہ تاریخ اچ ٻہوں چنگے ویلھے اتے موقع آئن لیکن اڄوکی فتح جیڑھی اللہ تعالیٰ پاکستان اتے پاکستان دی فوج کوں ݙتی اے ایں دی مثال ساݙی 78 سالہ تاریخ اچ کتھائیں کائنی مِلدی، ساݙا ازلی اتے ابدی دشمن اِتھوں کجھ میل پرے مشرقی سرحد دے اُتلے پاسے ٻہہ تے آپݨے زخم چٹیندا پئے، انشاء اللہ تعالیٰ ٻہوں وختی مغربی سرحد تے وی ساݙے دشمن اِیں طرح آپݨے زخم چٹیندے پئے ہوسن۔ اِے ڳالھ انہاں آپݨی رہائش گاہ تے پاکستان دی فوج ولوں بھارت کوں دندان شکن جواب ݙیوݨ اتے کامیاب آپریشن بنیان مرصوص تے مبارکباد ݙیوݨ کیتے آئے سٹینڈرڈ گروپ آف کالجز اینڈ کڈز کلب گرائمر سکول دے طالب علماں نال ڳالھ مُہاڑ کریندے آکھی ۔ اُنھاں آکھیے جو ہُݨ اساں کوں مودی کوں کجھ آکھݨ دی لوڑھ کائنی کیوں جو بھارت دے چپے چپے اچ اُنھاں دی شان اچ جیڑھا کجھ آکھیا ویندا پئے او اساں وی کائنی آکھ سڳدے۔ اُنھاں آکھیے جو اے حق دی جنگ ساݙی قومی وحدت اتے اتفاق دا باعث بݨی کیوں جو اڄ توں پندرہ 20 ݙینھ پہلے ساݙی قومی وحدت اتے اتفاق اچ دراڑاں نظر آندیاں ہَن لیکن الحمدللہ اڄ قوم ھک اے تے ایں دی سُنڄاݨ ساݙی پاک فوج دی بہادری بݨ ڳئی اے جیندے تے میں آپݨی فوج کوں سلام پیش کرینداں۔ اُنھاں آکھیے جو میں پاک فوج دے سربراہ جنرل عاصم منیر، ایئر چیف مارشل ظہیر احمد بابر، نیول چیف نوید اشرف اتے جوائنٹ چیف آف سٹاف کمیٹی دے چیئرمین ساحر شمشاد کوں مبارخ باد پیش کرینداں جو اُنھاں دے جوان ٻال اتے ٻالڑیاں جرات اتے بہادری نال لڑئن ایں اچ اُنھاں ساریاں دی قیادت دا ٻہوں وݙا ہتھ اے، تُہاݙی قیادت ہی ہئی جئیں اِنھاں جواناں دے حوصلے اچ برکت پاتی، تُہاݙے حوصلے اتے جرات و بہادری دا میں آپ چشم دید گواہ ہاں، میں آپݨی ساری حیاتی اچ 1965 توں اڄ تئیں سارے جھیڑیں دا ٻہوں نیڑے توں مُشاہدہ کیتے لیکن جیویں ساݙی قیادت ایں ویلھے جذبہ ایمانی نال بھرپور ہئی ایں دی مثال ماضی اچ کائنی مِلدی۔ اُنھاں آکھیے جو وزیراعظم محمد شہباز شریف ہر ویلھے اتے ہر موقع تے آپݨی قوم دی قیادت کیتی اتے بہادر فوج کوں اے یقین ݙیوائے جو سویلین حکومت دل و جان نال تُہاݙے نال اے اتے تُہاݙیاں قربانیاں دی معترف اے، مُلخ اتے قوم دے دفاع کیتے وزیراعظم محمد شہباز شریف اے یقین ݙیوائے جو اساں کوں جِتھاں تئیں وی ونڄݨا پووے اللہ تعالیٰ دے فضل نال سویلین حکومت آپݨی 25 کروڑ عوام دے نال آپݨی بہادر فوج دے نال مونڈھے نال مونڈھا رلا تے کھڑی اے۔ وزیر دفاع دا آکھݨ ہا جو جیڑھیاں قوماں آپݨی تاریخ بھُل ویندن تاں ول تاریخ وی اُنھاں کوں بھُل ویندی اے۔ اُنھاں اِتھاں موجود اُستاداں کوں مخاطب کریندے ہوئے آکھیے جو موجودہ اتے آوݨ آلیاں نویاں نسلاں کوں آپݨی تاریخ توں واقف کرواؤ اتے اُنھاں کوں ݙساؤ جو کیویں بانی پاکستان قائداعظم محمد علی جناح دی قیادت اچ برصغیر پاک و ہند دے مسلماناں کیویں لبیک آکھیا اتے ہک نواں مُلک پاکستان وجود اچ آیا، جݙاں توں اساں آزادی حاصل کیتی اے تݙاں توں ہی ساݙا ازلی اتے ابدی دشمن بھارت ساݙے پِچھے لڳیا ہویا اے تے ول 10 مئی دی رات ہک فیصلہ کن موڑ آئے اتے ہک فیصلہ کن باب لکھیا ڳیا جئیں کوں ساݙی مسلح اتے بہادر فوج آپݨیاں قربانیاں، جرات اتے بہادری نال لکھیا جیندے تے اساں سارے آپݨی بہادر فوج کوں سلام پیش کریندوں ۔ اُنھاں دعا کیتی جو اللہ تعالیٰ ساریں کوں خوش رکھے اتے ساݙے نینگر ٻال اتے ٻالڑیاں کوں محفوظ، مستحکم اتے خوشحال پاکستان اچ حیاتی گزارݨ دا موقع مِلے۔ اُنھاں آکھیے جو ہُݨ ساݙی جنگ دہشت گرداں دے خلاف اے، اساں بھارت کوں مشرقی محاذ تے زمین تے، ہوااچ اتے پاݨی اچ ہر جاہ تے شکست ݙتی لیکن بھارت ساݙیاں مغربی سرحداں تے وی مختلف پراکسیز دے ذریعے جنگ لڑویندا پئے اتے اڄ توں کائناں بلکہ پچھلے کئی ݙھاکیں توں لڑویندا پئے ۔ اُنھاں اظہار تشکر اتے پاک فوج نال اظہار یکجہتی اتے اُنھاں کیتے پیار دے پُھل نچھاور کرݨ کیتے آوݨ آلے طالب علماں اتے اُنھاں دے اُستاداں سودھے سارے لوکاں دا شکریہ وی ادا کیتا۔
