لاہور۔17 مئی (اے پی پی) وفاقی وزیر منصوبہ بندی و ترقی احسن اقبال آکھیے جو دنیا اچ قیام امن اتے سماجی اتے معاشی مسئلیاں دے حل کیتے سیرت النبی ﷺ کوں عملی زندگی اچ اپناوݨ ویلھے دی اہم لوڑھ اے۔ او لاہور اچ سیرت سنٹر دے دورے دے موقع تے اجلاس نال خطاب کریندے پئے ہن۔ احسن اقبال آکھیے جو حضور اکرم ﷺ دی زندگی پوری انسانیت کیتے مشعل راہ اے اتے انہاں دی سیرت تے عمل کرتے موجودہ دور دے چیلنجز نال نبڑیا ونڄ سڳدے۔ وفاقی وزیر ݙسائے جو مسلم لیگ (ن) دی حکومت پورے ملک اچ سیرت النبی ﷺ دی روشنی اچ تحقیق اتے تعلیم دے ودھارے کیتے نو (9) سیرت چیئرز قائم کرݨ دا فیصلہ کیتے۔ انہاں چیئرز دا مقصد لیڈرشپ، گورننس، انسانی حقوق، سماجی انصاف، فلاح و بہبود، تجارت، تعلیم،تریمتاں دے حقوق، عالمی امن، بین المذاہب ہم آہنگی، پائیدار ترقی اتے ماحولیاتی مسئلیاں جیہے اہم شعبیاں اچ قرآن و سنت توں رہنمائی حاصل کرݨ اے۔ انہاں آکھیے جو انہاں چیئرز دے تحت تحقیق دے ذریعے نینگر نسل کوں سیرت النبی ﷺ نال جوڑݨ اچ مدد ملسی۔ اجلاس دے بعد وفاقی وزیر سیرت سنٹر لاہور دی عمارت دا دورہ کیتا، جتھاں انہاں مختلف شعبہ جات دا معائنہ کیتے۔ انہاں اعلان کیتے جو انہاں سیرت چیئرز کیتے ملک دے بہترین 9 اسکالرز کوں سݙوایا ویسی تاں جو او موجودہ دور دے مسئلیں دا اسلامی تناظر اچ حل پیش کرن۔
