قازان۔17 مئی (اے پی پی) وفاقی وزیر مواصلات عبدالعلیم خان آکھیے جو پاکستان چین، افغانستان اتے ایران دے رستے سینٹرل ایشیا، یورپ اتے روس تئیں 6 ممکنہ تجارتی راہداریاں دی نشاندہی کر ݙتی اے جئیں موجب کراچی توں ماسکو بذریعہ چین اتے قازقستان، گوادر توں افغانستان دے ذریعے ماسکو اتے ترکمانستان اتے ایران توں آذربائیجان اتے روس تئیں دے روڈ نیٹ ورک شامل ہن۔ اے ڳالھ انہاں قازان فورم دے اختتامی سیشن نال خطاب کریندے آکھی۔ عبدالعلیم خان آکھیے جو پاکستان ساؤتھ ایشیا اتے سینٹرل ایشیا وچال ٹرانزٹ پوائنٹ نی بلکہ اکنامک برج دے طور تے کم کرݨ چاہندے ایں کیتے پچھلے سالاں اچ تھیوݨ آلے کئی ہک معاہدیاں سودھے شنگھائی تعاون تنظیم اچ پاکستان ودھ چڑھ تے کم کریندا پئے۔ انہاں آکھیے جو مزار شریف توں کوہاٹ ریل دے منصوبے تے 633 ملین ڈالر دی وݙی لاڳت آسی جݙاں جو پاکستان سینٹرل ایشیا کوں گرم پاݨی تئیں رسائی ݙیوݨ دا وی خواہشمند اے، ایویں گوادر پورٹ توں کارگو اتے شپمنٹ دا آغاز تھی چکیے ۔ انہاں آکھیے جو مواصلات دے شعبے اچ پاکستان نارتھ ٹو سائوتھ اشتراک اچ ودھ دلچسپی رکھیندے جݙاں جو پاکستان اچ سکھر۔حیدرآباد موٹروے ایم۔6 سرمایہ کاری کیتے پرکشش منصوبہ اے۔ وفاقی وزیر مواصلات عبدالعلیم خان آپݨے خطاب اچ آکھیے جو 2023 توں نیشنل لاجسٹک سیل دا ادارہ ازبکستان اتے قازقستان کیتے کارگو سروس ݙیندا پئے جݙاں جو پاکستان اچ تجارت دے ودھارے کیتے پچھلے سال اگست توں 126 ملکاں کیتے ویزا آن ارائیول دی سہولت متعارف کرا ݙتی ڳئی اے۔ انہاں قازان فورم توں آپݨے خطاب اچ کراچی، کوئٹہ اتے گوادر توں سینٹرل ایشیا اتے یورپ تئیں روڈ نال جڑݨ بارے اچ مختلف پہلوواں تے روشنی پاتی اتے ݙسایا جو ایران دے رستے روس کیتے ریلوے ٹرین دے پائلٹ پراجیکٹ تے وی کم تھیندا پئے۔ وفاقی وزیر مواصلات عبدالعلیم خان قازان فورم دے انعقاد کوں خوش آئند قرار ݙیندے ہوئیں پاکستان دی طرفوں ودھ چڑھ تے کردار ادا کرݨ دے عزم دا اعادہ کیتا اتے روس دے نائب وزیراعظم مرات خسنولن اتے روسی وزیر ٹرانسپورٹ رومن اسٹاروویٹ دی میزبانی تے روس دے صدر ویلادی میر پیوٹن دا شکریہ ادا کیتا۔ ایندے علاوہ روس دے نائب وزیراعظم مرات خسنولن اتے وفاقی وزیر مواصلات عبدالعلیم خان وچال وفود دے نال ملاقات اتے سانجھا اجلاس منعقد تھیا جیندے اچ ݙوہیں ملکاں وچال مختلف شعبیاں اچ تعاون ودھاوݨ اتے خاص طور تے مواصلات دے شعبے اچ سرمایہ کاری سودھے اہم معاملیں تے ڳالھ مہاڑ تھئی۔ وفاقی وزیر عبدالعلیم خان آکھیے جو پاکستان روس نال وݙے اشتراک اچ ودھ دلچسپی رکھیندے۔ رشین فیڈریشن دے نائب وزیراعظم مرات خسنولن آپݨی ڳالھ مہاڑ اچ آکھیے جو خطے اچ ہر پاسوں ترقی اتے سانجھا تعاون چاہندوں ، قازان فورم اچ پاکستان دی نمائندگی چنڳی ڳالھ اے جݙاں جو روس پاکستان نال معاشی، ثقافتی اتے ٻئے شعبیاں اچ تعاون ودھاوݨ چاہندے۔ اے ڳالھ ݙسݨ دے لائق اے جو وفاقی وزیر مواصلات عبدالعلیم خان روس دے نائب وزیراعظم مرات خسنولن نال پاکستان دی موجودہ صورتحال تے وی ڳالھ مہاڑ کریندے ݙسائے جو پاکستان خطے اچ امن دا داعی اتے عدم جارحیت دا حامی اے ایں کیتے اڄوکی صورتحال اچ پاکستان ٻہوں تحمل، دور اندیشی اتے معاملہ فہمی نال کم ڳھدا۔ مرات خسنولن اتے عبدالعلیم خان وچال ملاقات اچ گرمجوشی اتے پیار بھریے جذبات دا اظہار کیتا ڳیئے اتے پاکستان اتے روس وچال مختلف شعبیاں اچ تعلقات دے ودھارے تے اتفاق کیتا ڳئے۔
