راولپنڈی۔17 مئی(اے پی پی)صدر مملکت آصف علی زرداری گوجرانوالہ چھاؤݨی دا دورہ کیتے اتے معرکہ حق دی کامیابی نال تکمیل اچ افواج پاکستان دے چنڳے طور طریقے اتے پیشہ ورانہ مہارت دی تعریف کریندے ہوئیں بلا اشتعال جارحیت دا مقابلہ کرݨ کیتے انہاں دے پکے ارادے اتے پکی ہمت دا اعتراف کیتے۔ وفاقی وزیر داخلہ سید محسن رضا نقوی وی انہاں دے نال ہن۔ پاک فوج دے شعبہ تعلقات عامہ (آئی ایس پی آر) موجب گوجرانوالہ چھاؤݨی پڄݨ تے آرمی چیف جنرل سید عاصم منیر صدر مملکت دا استقبال کیتا۔
ایں موقع تے منگلہ اتے گوجرانوالہ کور دے کمانڈرز وی موجود ہن۔ صدر مملکت معرکہ حق دی کامیابی نال تکمیل اچ افواج پاکستان دے چنگے طور طریقے اتے پیشہ ورانہ مہارت دی تعریف کریندے ہوئیں بلا اشتعال جارحیت دا مقابلہ کرݨ کیتے انہاں دے پکے ارادے اتے پکی ہمت دا اعتراف کیتے۔ انہاں دھرتی ماء دے دفاع اچ آپݨیاں جاناں دا نذرانہ پیش کرݨ آلے فوجی اتے سول شہیداں کوں خراج عقیدت پیش کریندے ہوئیں ایں عزم دا اعادہ کیتا جو انہاں دی قربانی ہک مقدس امانت اتے پائیدار قومی فخر دا ذریعہ اے۔
انہاں ایں ڳالھ تے زور ݙتا جو قوم دے پکے جذبے نال سرشار دھرتی دے پتر دھرتی ماء دے دفاع دے اٹل عزم دے نال کھڑن اتے غیر معمولی بہادری اتے پیشہ ورانہ سجھ ٻُجھ دے نال دشمن دے ارادیں کوں ناکام بݨائے ۔ انہاں مزید آکھیے جو تاریخ گواہ اے جو کجھ گھنٹے دے اندر پاکستان دی مسلح افواج کیویں بے مثال عزم اتے ہمت دے نال جارحیت دا منہ بھن جواب ݙتا اتے پاکستان دی طاقت، صلاحیت اتے قومی اتحاد دا واضح پیغام ݙتا۔ افسراں اتے نینگراں نال ڳالھ مہاڑ کریندے صدر مملکت آصف علی زرداری انہاں دے وݙے حوصلے، جنگی تیاریاں اتے فرائض تے لگن دی تعریف کیتی۔ انہاں آپریشن بنیان مرصوص دی کامیاب تکمیل تے دلوں مبارخ پیش کیتی اتے قوم دے محافظاں تے فخر دا اظہار کریندے ہوئیں ایں عزم دا اعادہ کیتے جو پاکستان دے عوام آپݨے بہادر نینگراں کوں قومی وقار اتے خودمختاری دے سچے محافظ دے طور تے وݙی قدر دی نگاہ نال ݙیکھدن۔
