اسلام آباد۔ 18 مئی (اے پی پی) پنجاب ڈیزاسٹر مینجمنٹ اتھارٹی (پی ڈی ایم اے) عوام کوں ضروری احتیاطی تدابیر ورتݨ دا مشورہ ݙیندے آکھیے پنجاب دے وݙے شہراں تے میدانی علاقیاں اچ زور دی گرمی دی لہر اچ شدت آوݨ دا امکان اے تے 19 مئی تئیں درجہ حرارت اچ غیر معمولی ودھارے دی پیش گوئی کیتی ڳئی اے۔ پی ڈی ایم اے دے ترجمان اپݨے ہک انٹرویو اچ مری ونڄݨ دا ارادہ رکھݨ آلے سیاحواں تے زور ݙتا جو او موسم دی صورتحال توں باخبر رہن تے غیر مستحکم موسمی حالات اچ غیر ضروری سفر نہ کرن ۔ ترجمان عوام کوں سخت موسمی حالات دے دوران گھر اچ راہوݨ، کھلیاں جہیں تے ونڄݨ توں گریز تے ہدایات تے عمل کرݨ دا مشورہ ݙتا۔ اُنہاں شہریاں کوں چتاوݨی ݙتی جو او موسمی ایڈوائزری توں باخبر رہن۔ ترجمان پنجاب دے کمشنرز تے ڈپٹی کمشنرز کوں متوقع زور دے مینھ پاروں ہائی الرٹ رہݨ دی ہدایت وی کیتی۔ پاکستان دے محکمہ موسمیات (پی ایم ڈی) اتوار شام تے رات دے ویلھے گلگت بلتستان، اُتلے خیبر پختونخوا، کشمیر تے پہاڑی علاقیاں اچ کجھ جہیں تے اندھاری گُھلݨ تے کھمݨ گاجاں نال مینھ وسݨ دی پیشگوئی کیتی اے ۔ ݙوجھے پاسے پنجاب، خیبرپختونخوا، سندھ تے بلوچستان اچ زور دی گرمی پووݨ دا امکان اے ۔ ݙینھ ویلھے درجہ حرارت اچ ودھارا تھیسی تاں جو کجھ علاقیاں اچ شام تے رات ویلھے اندھاری گُھلݨ ، کھمݨ گاجاں نال مینھ وس سڳدے ، جیں پاروں عارضی ریلیف ملسی۔
