اسلام آباد۔18 مئی (اے پی پی) نائب وزیراعظم /وزیر خارجہ سینیٹر محمد اسحاق ڈار عوامی جمہوریہ چین دے وزیر خارجہ وانگ یی دی دعوت تے 19 توں 21 مئی تئیں بیجنگ دا سرکاری دورہ کریسن۔ ترجمان دفتر خارجہ توں جاری بیان موجب دورے دے دوران وزیر خارجہ اسحاق ڈار چینی وزیر خارجہ وانگ یی نال جنوبی ایشیا دی ابھردی علاقائی صورتحال اتے امن و استحکام تے ایندے اثرات تے تفصیلی ڳالھ مہاڑ کریسن۔ ݙوہیں فریق پاک چین ݙوطرفہ تعلقات دے سارے پہلوواں دا وی جائزہ گھنسن اتے سانجھی دلچسپی دی علاقائی اتے عالمی پیشرفت تے ڳالھ کریسن۔ اے دورہ پاکستان اتے چین وچال جاری اعلیٰ سطحی تبادلیں دا حصہ اے۔ اے آل ویدر اسٹریٹجک کوآپریٹو پارٹنرشپ کوں مزید تکڑا بݨاوݨ کیتے ݙوہیں ملکاں دے سانجھے عزم دی وی نشاندہی کریندے۔
