لاہور۔18 مئی (اے پی پی) وفاقی وزیر اطلاعات تے نشریات عطاء اللہ تارڑ آکھیے جو پاک فوج جیہڑی جرات نال بھارت کوں منہ بھن جواب ݙتے او تاریخ اچ ہمیشہ یاد رکھیا ویسی، پاک فوج دے تاریخی رد عمل دے بعد دشمن کوں چٹا جھنڈا لہراوݨ تے مجبور تھیوݨا پیا، پاکستان دا دفاع ناقابل تسخیر اے، دشمن کوں سفارتی محاذ تے وی شکست ݙتی ڳئی۔ آپݨے حلقے اچ معرکہ حق آپریشن بنیان مرصوص دے حوالے نال کڈھی ڳئی اظہار تشکر ریلی نال خطاب کریندے وفاقی وزیر اطلاعات آکھیے جو وطن عزیز دے دفاع کیتے پاک فوج دیاں قربانیاں تے عزم قابل تعریف ہن۔ وفاقی وزیر اظہار تشکر ریلی اچ ودھ چڑھ تے شرکت تے عوام کوں خراج تحسین پیش کریندے آکھیے جو وزیراعظم شہباز شریف دی قیادت تے آرمی چیف جنرل سید عاصم منیر دی ولولہ انگیز رہنمائی اچ بھارت کوں منہ بھن جواب ݙتا ڳیا، اڄ پوری قوم متحد اے، سوشل میڈیا استعمال کرݨ آلیں تے میڈیا دا دلوں شکر گزار ہاں جنہاں بیانیہ دی جنگ لڑی۔ عطاء اللہ تارڑ آکھیے جو وزیراعظم شہباز شریف ݙینھ رات پاکستان دے دفاع کیتے اپݨاں کردار ادا کریندے رہ ڳئے، جنرل عاصم منیر دی قیادت اچ فتح میزائل جݙاں فائر کیتا ڳیا تاں بھارت اچ کھلبلی مچ ڳئی۔ انہاں آکھیے جو بھارت رات دے اندھارے اچ حملہ کیتا تاں ایئر فورس دے شاہیناں بھارت دے چھی جنگی جہاز مار ڈھائے، ساݙی فضائیہ بھرپور طریقے نال دشمن دے حملے کوں ناکام بݨائے تے بری فوجاں دشمن دے بریگیڈ ہیڈ کوارٹر اݙائے جیندے بعد دشمن چٹا جھنڈا لہراوݨ تے مجبور تھیا، دشمن کوں نہ پتہ ہئی جو اوندا کیہڑی فوج، فضائیہ تے بحریہ نال واسطہ پئے ڳئے۔ وفاقی وزیر اطلاعات آکھیے جو ملک دے دفاع کیتے جاناں دے نذرانے پیش کرݨ آلے شہداء دے خانداناں کوں سلام پیش کریندوں ، او جہان توں تاں ٹر ڳئے پر انہاں وطن عزیز تے آنچ نی آوݨ ݙتی ۔ انہاں آکھیے جو اے خوش قسمت قوم اے جیندیاں ماواں اپݨے ٻالاں کوں جذبہ شہادت نال وݙا کریندیاں ہن، جیہڑی قوم سر تے کفن ٻدھ تے گھروں نکلدی ہووے اوں قوم کوں کوئی ہرا نی سڳدا ۔ وزیر اطلاعات عطاء اللہ تارڑ آکھیے جو وزیراعظم دی قیادت اچ نیشنل سیکیورٹی کمیٹی جیہڑے فیصلے کیتے تے پاک فوج جیڑھا کردار ادا کیتا او ہمیشہ تاریخ اچ یاد رکھیا ویسی۔ انہاں آکھیے جو اساں دشمن توں 1971ء دا بدلہ گھن ڳھدے، ساݙی بہادر فوجاں تے سپہ سالار بہادری تے دلیری نال دشمن دے ناپاک عزائم مٹی اچ رلا ݙتے۔ انہاں غزوہ بدر دا حوالہ ݙیندے آکھیے جو غزوہ بدر اچ مسلماناں دی تعداد گھٹ ہووݨ دے باوجود کافراں تے مسلماناں کوں غلبہ حاصل تھیا۔ انہاں آکھیے وزیراعظم شہباز شریف تے آرمی چیف دی قیادت اچ ملکی دفاع کوں یقینی بݨایا ڳئے، اڄ وزیراعظم دی ولولہ انگیز قیادت کوں سلام پیش کرݨ دا ݙینھ اے۔ وزیراعظم ݙینھ رات سفارت کاراں نال ملاقاتاں کریندے رہیے تے پاکستان دا مقدمہ لڑدے رہیے، انہاں دنیا کوں ݙسایا جو اساں پہلگام واقعے دی تحقیقات کیتے تیار ہاسے پر بد نیت دشمن تحقیقات توں بھڄ ڳئے ۔ انہاں آکھیے جو بھارت دی جارحیت دا منہ بھن جواب ݙتا ڳیا تاں ثابت تھی ڳئے جو پاک فوج کوں کوئی شکست نی ݙے سڳدا ۔ وزیر اطلاعات آکھیے جو نینگراں سوشل میڈیا تے جیویں پاکستان دا مقدمہ لڑیے اوں دی وی تاریخ لکھی ویسی۔ پورا ملک سوشل میڈیا تے میڈیا تے بھارت دے کوڑے پروپیگنڈے دا مقابلہ کریندا پیا ہئی۔ انہاں آکھیے جو وزیراعظم شہباز شریف دی قیادت اچ اساں انفارمیشن وار فیئر اچ وی ݙینھ رات ہک کرتے بھارتی پروپیگنڈے دا منہ بھن جواب ݙتا ۔ پاکستان اچ فتح دا جشن منایا ویندا پیا ہئی تے بھارت اچ صف ماتم وچھی ہوئی ہئی، بھارتی عوام اپݨے حکمراناں توں سوال پئے کریندے ہن جو کوڑا پروپیگنڈا کیوں کیتا ڳئے۔ وزیر اطلاعات آکھیے جو میاں نواز شریف دے دور اچ کیتے ڳئے چھی ایٹمی دھماکیں دی تاریخ دوہریندے وزیراعظم شہباز شریف دی قیادت اچ دشمن دے چھی طیارے ڈھائے ڳئن جیں دشمن دے سارے دعوے نشابر کرݙتے تے دشمن صرف ملبہ ای چیندے رہ ڳئے۔ انہاں آکھیے جو ایں فتح تے اساکوں سجدہ ریز تھیوݨ دا موقع اے، میݙی والدہ وی ݙینھ رات ساݙے کیتے دعاواں کریندی رہی تے حلقے دے ہر نینگر ، ماء بھیݨ دا حوصلہ ودھایا۔ عطاء اللہ تارڑ آکھیے جو اساں امن پسند لوک ہیسے، پاکستان امن چاہندے پر دشمن ساݙی امن دی خواہش کوں کمزوری سمجھیا جیندھا بھرپور جواب ݙتا ڳیا۔ انہاں آکھیے جو ہݨ وزیراعظم شہباز شریف دی قیادت اچ کشمیر تے ڳالھ مہاڑ تھیسی۔ انہاں آکھیے جو پاکستان دے دوست ملکاں وی ایں حوالے نال اپݨِاں بھرپور کردار ادا کیتا، امریکی صدر ڈونلڈ ٹرمپ اپݨا کردار نبھائے ، چین وی پاکستان دا بھرپور ساتھ ݙتا، سعودی عرب، یو اے ای، قطر، ترکیہ، ایران، آذربائیجان تے جیڑھے وی ملک نال کھڑے رہیے انہاں دا شکریہ ادا کریندوں ، ہݨ امن تے ایں ملک دی معاشی ترقی کوں اڳوں ودھاوݨ دا ویلھا اے ، جتھاں اساں عسکری محاذ تے دشمن کوں شکست ݙتی اے اتھاں اڑان پاکستان دے تحت معاشی میدان اچ وی دشمن کوں شکست ݙیسوں۔ اظہار تشکر ریلی کالج روڈ توں اکبر چوک ونڄ تے مُکی۔
