غزہ۔19 مئی (اے پی پی) سنوار کوں غزہ تے اسرائیلی حملیاں اچ گھٹ توں گھٹ 17 فلسطینی شہید تھی ڳئے۔ الجزیرہ ٹی وی موجب اسرائیلی فوج جنوبی غزہ اچ خان یونس اَتے ایندے آسے پاسے زبردست فضائی حملہ کیتا جیندے نتیجے اچ 6 بندے شہید اَتے درجناں زخمی تھی ڳئے۔ حملے اچ خان یونس اچ واقع ناصر میڈیکل کمپلیکس کوں وی نشانہ بݨایا ڳیا۔ اسرائیلی وزیر اعظم دے مشیر دیمتری گینڈلمین موجب اسرائیل دی افواج غزہ اچ آپریشن “گیڈونز چیریٹس” دے فیصلہ کن مرحلے اچ داخل تھی ڳئین اَتے شہر دے اندر پیش قدمی کریندی پئی ہِے۔ مشیر ݙسایا جو پچھلے ہفتے اچ اسرائیلی فضائیہ ایں علاقے اچ سینکڑاں اہداف کوں نشانہ بݨیندے ہوئیں عسکریت پسنداں دے ٹکاݨے کوں وی تباہ کیتا۔ الجزیرہ دے مطابق 18 مئی کوں غزہ تے اسرائیلی مسلح افواج دے حملیاں اچ گھٹ توں گھٹ 151 بندے شہید تھئے۔ جِنھاں اچ 70 غزہ شہر اَتے ایندے شمال وچ گولہ باری نال شہید تھئے۔ اسرائیلی فوج دے ترائ ڈویژن ایں ویلے غزہ اچ زمینی کاروائیاں وچ حصہ گھِندے پئِن۔ الجزیرہ موجب قابض فوجیاں شمالی غزہ اچ انڈونیشیائی ہسپتال کوں مسمار کرݨ شروع کر ݙِتّا ڳئے جِیندی عمارت اچ اَڄ وی گھٹ توں گھٹ 55 بندے موجود ہِن۔ رپورٹ دے مطابق اسرائیل فوج بھاری فوجی سازوسامان اَتے بلڈوزر دا استعمال کریندیں ہوئیں ہسپتال دے گیٹ کوں ݙھا ݙِتّا اَتے عمارت دی شمالی کندھ کوں مکمل طور تے تباہ کر ݙِتّا، عمارت اچ 12 ڈاکٹر اَتے 43 مریض پھسے ہوئِن، علاقے اچ فائرنگ اَتے گولہ باری دی وی اطلاع اے جݙاں جو ہسپتال دے انتہائی نگہداشت دے یونٹ (آئی سی یو) کوں وی نشانہ بݨایا ویندا پئے۔ غزہ دی وزارت صحت موجب انڈونیشیا دا اے ہسپتال شمالی غزہ وچ کم کرݨ آلا چھیکڑی طبی مرکز ہَا جئیں جبالیہ، بیت لاہیا اَتے بیت حنون وچ رہݨ آلے تقریباً چار لکھ لوکاں کوں طبی خدمات ݙتن۔
