بیجنگ۔ 19 مئی (اے پی پی) چین دی وزارت خارجہ دی ترجمان ماوننگ آکھیا جو نائب وزیر اعظم اتے وزیر خارجہ محمد اسحاق ڈار دا چین دا دورہ پاکستان دی حکومت دی پاک چین تعلقات کوں اہمیت ڈیوݨ دی عکاسی کریندے۔ سنوار کوں آپݨی معمول دی پریس بریفنگ اچ اسحاق ڈار دے ترائے ڈینھ دے سرکاری دورہ چین تے تبصرہ کریندے ہوئیں ترجمان آکھیا جو چین اتے پاکستان ہر موسم دے سٹریٹجک شراکت دار ہن، ڈوہیں ملک قریبی اتے اعلیٰ سطحی رابطے اتے تعاون برقرار رکھیندن۔ انہاں آکھیا جو چین پاکستان دے رَل تے اعلیٰ قیادت وچال طے تھیوݨ آلے اہم معاملیاں تے عمل درآمد کوں ٻیا اگوں ودھاوݨ، سٹریٹجک رابطیاں کوں ودھاوݨ اتے تعاون کوں ٻیا ودھاوݨ کیتے تیار اے تاں جو ڈوہیں ملکاں وچال قریبی ہم نصیب مستقبل دی تشکیل کوں نویں جہت ڈتی ونج سگے۔ پاکستان اتے بھارت وچال اڄوکی کشیدگی دی صورتحال تے گالھ مہاڑ کریندیں ہوئیں انہاں آکھیا جو چین ایں بارے آپݨا موقف کئی واری واضح کیتے اتے ٻیا آکھیا جو اساں ڈوہیں ملکاں نال رابطے اچ رہسوں اتے جامع اتے دیرپا جنگ بندی کیتے تعمیری کردار ادا کریندے رہسوں تاں جو علاقائی امن تے استحکام کوں یقینی ٻݨایا ونج سڳے۔ ہک سوال دے جواب اچ ماوننگ آکھیا جو میں تہاکوں ڈساوݨ چاہندی ہاں جو بھارت اتے پاکستان ڈوہیں چین دے اہم ہمسایہ ملک ہن۔ چین ہمیشہ توں پاکستان دے نال آُپݨے تعلقات کوں وݙی اہمیت ڈیندے۔ انہاں آکھیا جو چین آپݨے ہمسایہ ملکاں نال چنگے تعلقات دی پالیسی تے قائم اے۔ انہاں ٻیا آکھیا جو بھارت اتے پاکستان دے تعلقات اچ کشیدگی دے بعد توں چین ہمیشہ ہک غیر جانبدار اتے منصفانہ موقف اپنائے اتے ڈوہائیں ملکاں کوں تحمل اتے صبر دا مظاہرہ کرݨ اتے صورتحال کوں ٻیا وڳڑݨ توں روکݨ دی اپیل کیتی اے۔ ماوننگ آکھیا جو اساں ڈوہیں ملکاں وچال تھیوݨ آلی جنگ بندی دا خیر مقدم کریندوں اتے ایندی تعریف کریندوں اتے اساں ہک جامع اتے پائیدار جنگ بندی دے قیام اتے علاقائی امن تے استحکام کیتے تعمیری کردار ادا کرݨ کیتے تیار ہیسے۔
