ریاض ۔20مئی (اے پی پی) خادم حرمین شریفین شاہ سلمان بن عبدالعزیز آپݨے ذاتی خرچے تے ہک ہزار فلسطینی شہداء، قیدیاں اتے زخمیاں دے گھر آلیاں کوں حج کراوݨ دی ہدایت کیتی اے۔ سعودی پریس ایجنسی موجب اے میزبانی ’خادم حرمین شریفین دے مزماناں کیتے حج، عمرہ اتے زیارت پروگرام‘ دے تحت ہوسی جینکوں وزارت اسلامی امور، دعوت تے ارشاد ولوں نافذ کیتا ویندے۔ ایں موقع تے وزیر اسلامی امور، دعوت و ارشاد شیخ ڈاکٹر عبداللطیف بن عبدالعزیز آل الشیخ خادم حرمین شریفین شاہ سلمان بن عبدالعزیز اتے ولی عہد شہزادہ محمد بن سلمان دا دل توں شکریہ اتے قدردانی دا اظہار کیتا۔ انہاں ایں عظیم الشان اقدام کوں سعودی عرب اتے اوندی قیادت دی فلسطینی عوام نال مستقل حمایت، اسلامی اخوت دے مضبوط رشتے اتے خیرسگالی دے جذبے دا واضح مظہر قرار ݙتے۔
