لاہور۔21 مئی (اے پی پی) پاکستان کرکٹ بورڈ (پی سی بی) دی سلیکشن کمیٹی بنگلہ دیش دے خلاف ترائے میچاں تے مشتمل ہوم ٹی ٹونٹی سیریز کیتے 16 رکنی قومی سکواڈ دا اعلان کر ݙتے۔ آل راؤنڈر سلمان علی آغا کوں کپتان برقرار رکھیا ڳیا اے جݙاں جو شاداب خان کوں نائب کپتان مقرر کیتا ڳئے۔ اے سیریز لاہور دے قذافی سٹیڈیم اچ کھیڈی ویسی۔ بنگلہ دیش دے خلاف ترائے میچاں دی ہوم ٹی ٹونٹی سیریز دے شیڈول دا اعلان آندے کجھ ݙینھ اچ متوقع اے۔ ٹیم دا انتخاب جاری ایچ بی ایل پی ایس ایل 10 اچ کھڈاریاں دی کارکردگی دی بنیاد تے کیتا ڳئے، جیڑھا 25 مئی کوں مُکدا پئے۔ ترجمان پی سی بی دے موجب 16 رکنی سکواڈ اچ سلمان علی آغا (کپتان)، شاداب خان (نائب کپتان)، ابرار احمد، فہیم اشرف، فخر زمان، حارث رؤف، حسن علی، حسن نواز، حسین طلعت، خوشدل شاہ، محمد حارث (وکٹ کیپر)، محمد وسیم جونیئر، محمد عرفان خان، نسیم شاہ، صاحبزادہ فرحان (وکٹ کیپر) اتے صائم ایوب شامل ہن۔
