اسلام آباد۔22 مئی (اے پی پی) وفاقی وزیر خزانہ تے محصولات سینیٹر محمد اورنگزیب عالمی بینک دے کنٹری پارٹنرشپ فریم ورک دے اہداف دے حصول سانگے حکومت دے عزم دا اعادہ کریندیں ہوئیں آکھیے جو ماحولیاتی تحفظ تے پائیدار ترقی معاشی منصوبہ بندی دا مرکزی جزو اے. کنٹری پارٹنرشپ فریم ورک تے عمل درآمد سانگے وزارت خزانہ، متعلقہ وزارتاں تے اداریاں اچ آپسی سانجھ کوں مؤثر ٻݨایا ویندا پئے. انہاں اے گالھ خمیس کوں عالمی بینک دے اعلیٰ سطحی وفد نال ملاقات اچ آکھی. عالمی بینک دے وفد دی قیادت بینک دی منیجنگ ڈائریکٹر آپریشنز اینا بیئرڈے کریندی پئی ہئی. ملاقات دا مقصد ڈو پاس تعاون کوں ٻیا مضبوط ٻݨاوݨ، عالمی بینک دی مالی امداد دے منصوبیاں دا جائزہ گھنݨ، تے حال ای اچ ورلڈ بینک دے سانجھ نال شروع کیتے گئے ڈاہ سالہ کنٹری پارٹنرشپ فریم ورک (سی پی ایف) تے عمل درآمد اچ تیز کرݨ ہئی. گالھ مہاڑ اچ خاص کر سی پی ایف اچ شامل ترجیحی شعبیاں خصوصی طور ماحولیاتی تبدیلی نال نبڑݨ دی صلاحیت تے آبادی دے نظم و نسق سویݨ اہم موضوعات تے گالھ تھئی. فریقاں پاکستان اچ پائیدار ترقی تے طویل مدتی معاشی استحکام سانگے سی پی ایف دی اہمیت تے کردار تے اتفاق کیتا. اینا بیئرڈے مشکل لیکن ضروری معاشی اصلاحات کوں پایہ تکمیل تئیں پجاوݨ سانگے حکومت پاکستان دے مسلسل عزم کوں سراہیا، تے ماحولیاتی تحفظ تے پائیدار ترقی سانگے حکومتی کوششاں دی تعریف کیتی. وزیر خزانہ سی پی ایف دے اہداف دے حصول سانگے حکومت دے عزم دا اعادہ کیتا تے ماحولیاتی تحفظ تے پائیدار ترقی کوں معاشی منصوبہ بندی دا مرکزی جزو قرار ڈتا. انہاں سی پی ایف تے عمل درآمد سانگے وزارت خزانہ تے بئے سارے متعلقہ وزارتاں تے اداریاں دے نال آپسی اشتراک کوں مؤثر ٻݨاوݨ دی اہمیت تے زور ڈتا. وزیر خزانہ وزارت خزانہ، وزارت موسمیاتی تبدیلی تے بئے متعلقہ اداریاں دے اشتراک نال سی پی ایف تے موثر عمل درآمد سانگے جامع فریم ورک دی تیاری تے سارے عمل کوں مؤثر تے مربوط ٻݨاوݨ سانگے عالمی بینک دی تکنیکی معاونت دی درخواست کیتی. اینا بیئرڈے کنٹری پارٹنرشپ فریم ورک دے مقاصد دے حصول سانگے پاکستان کوں عالمی بینک دی مکمل حمایت دا یقین ڈیوائے تے معاشی اصلاحات دے نال نال ٹیکس نظام، توانائی، تے سماجی تحفظ دے شعبیاں اچ بینک دے تعاون تے حمایت دا اعادہ کیتا. انہاں پاکستان دے انسانی وسائل کوں مضبوط کرݨ تے معیشت کوں مستحکم ٻݨاوݨ سانگے ٻالڑیاں دی تعلیم تے تریمتیں کوں بااختیار ٻݨاوݨ دے اقدامات دی وی حمایت کیتی. فریقاں ایں عزم دا اظہار کیتا جو او آوݨ آلے مہینیاں اچ کنٹری پارٹنرشپ فریم ورک دے مؤثر نفاذ انداز تے پاکستان دی پائیدار ترقی سانگے مضبوط شراکت داری تے مبنی قریبی تعاون جاری رکھیسن.
