العربیہ موجب فلسطینی وزیر صحت اطلاع ݙتی اے جو اسرائیلی فوج ولوں اݙھائی مہینے توں ودھ عرصے تے خوراک دی ناکہ بندی نال غزہ اچ ایں صورتحال تھئی ڳئی اے جو گھٹ توں گھٹ 29 ٻال اتے بُڈھے بھُکے رہ تے جاں بحق تھی ڳئن۔ گزریل کئی ہفتیاں توں انسانی حقوق دیاں تنظیماں، عالمی ادارہ خوراک، اقوام متحدہ دے ٻئے ادارے ایں امر دی نشاندہی کریندے پئن جو غزہ اچ لمبے عرصے توں خوراک دی ناکہ بندی اسرائیلی فوج جاری کر رکھی اے جیڑھی کہیں وݙے انسانی المیے دا باعث بݨ سگدی اے۔ انہاں اداریاں دے مطابق تقریباً 23 لکھ توں ودھ فلسطینی شہری بھُک اتے قحط دی زد اچ ہن۔ جنہاں کوں اسرائیل گھٹ توں گھٹ اݙھائی مہینے توں ودھ عرصہ توں خوراک، پاݨی، دوائی سودھے ٻئی بنیادی ضرورتاں توں محروم کر رکھیے اتے ݙو مارچ توں غزہ دی ناکہ بندی جاری اے۔
