اسلام آباد۔23مئی (اے پی پی) عالمی مالیاتی فنڈ (آئی ایم ایف) آکھیے جو سارے مقررہ اہداف پورے تھیوݨ تے اصلاحات اچ پیش رفت دے بعد پاکستان کیتے قسط جاری کر ݙتی ڳئی اے، امید اے جو خطے اچ استحکام کیتے مسئلیاں دا پرامن حل کݙھیا ویسی۔ عالمی مالیاتی فنڈ دی ڈائریکٹر کمیونیکیشن جولی کوزاک واشنگٹن اچ پریس بریفنگ ݙیندیں ہوئیں ݙسایا جو پاکستان اتے بھارت وچال اڄوکے تنازعے دے تناظر اچ انسانی جاناں دے ضیان اتے انسانی المیے تے ݙکھ اتے ہمدردی دا اظہار کریندوں اتے امید کریندوں جو خطے اچ استحکام کیتے مسئلیاں دا پرامن حل کݙھیا ویسی۔ انہاں آکھیا جو آئی ایم ایف دے انتظامی بورڈ ستمبر 2024 اچ پاکستان کیتے توسیعی فنڈ سہولت (ای ایف ایف) پروگرام دی منظوری ݙتی ہئی۔ ایں ویلھے پہلے جائزے کیتے 2025 دی پہلی ترائے مہینے دا ویلھا مقرر کیتا ڳیا ہا، ایں ترتیب دے مطابق 25 مارچ 2025 کوں آئی ایم ایف دی ٹیم اتے پاکستانی حکام وچال پہلے جائزے کیتے سٹاف سطح دا معاہدہ تھیا جئیں کوں ایگزیکٹو بورڈ دے سامݨے پیش کیتا ڳیا اتے 9 مئی کوں بورڈ ایں جائزے کوں پورا کر ڳھدا۔ ایں جائزے دی تکمیل دے بعد پاکستان کوں متعلقہ قسط جاری کر ݙتی گئی۔ انہاں آکھیا جو قرضہ پروگراماں دے تحت بورڈ دا ویلھے ویلھے نال جائزہ گھنݨِ ہک معمول دا عمل اے تانجو ݙٹھا ونڄ سگے جو پروگرام صحیح پاسے ویندا پئے یا کائنا، شرطاں پوری تھیندی پئن یا نئیں، اتے کوئی پالیسی اچ تبدیلی دی لوڑھ اے تانجوہ پروگرام کوں ولا صحیح راہ تے گھن آیا ونڄ سگے؟ انہاں آکھیا جو پاکستان بارے بورڈ تسلیم کیتے جو پاکستان سارے مقررہ اہداف حاصل کر ڳھدن اتے اصلاحات بارے وی پیش رفت کیتی اے، ایں کیتے بورڈ پروگرام دی منظوری ݙے ݙتی۔ انہاں آکھیا جو بورڈ اچ ووٹنگ یا فیصلہ سازی دی تفصیلات عوامی سطح تے جاری کائنی کیتی ویندی، عمومی طور تے آئی ایم ایف بورڈ آپݨے فیصلے اتفاق رائے نال کریندے اتے ایں معاملے اچ وی اتنا اتفاق موجود ہا جو بورڈ جائزہ پورا کرݨ اتے پروگرام کوں اڳوں ودھاون تے متفق تھیا۔ انہاں آکھیا جو آئی ایم ایف ولوں رکن ملکاں کوں ادائیگیاں دے توازن دے مسئلے حل کرݨ کیتے معاونت ݙتی ویندی اے، توسیعی فنڈ سہولت پروگرام دے تحت ݙتی ونڄݨ آلی ساری رقم سٹیٹ بینک دے زر مبادلہ دے ذخائر اچ شامل کیتی ویندی اے۔ انہاں آکھیا جو آئی ایم ایف نال اتفاق رائے دے تحت پروگرام اچ حکومت ولوں سٹیٹ بینک توں کوئی قرضہ نہ گھنݨ اتے مالی نظم و نسق چنڳا بݨاون کیتے کئی ڈھانچہ جاتی شرطاں شامل ہن۔
