تہران ۔27مئی (اے پی پی) ایران دی فوج اسرائیل کوں حملے دی براہ راست دھمکی ڈے ݙتی اے۔ العربیہ موجب ایرانی فوج دے کمانڈر انچیف میجر جنرل عبدالرحیم موسوی اے بیان “مقدس دفاع” دے اٹھ جلداں تے مشتمل انسائیکلوپیڈیا دی نقاب کشائی دی تقریب اچ شرکت اچ ڈتا۔ ایرانی فوج دے کمانڈر انچیف میجر جنرل عبدالرحیم موسوی اسرائیل کوں دھمکی ڈیندیں ہوئیں آکھیا جو اگر حالات تقاضا کیتا تاں ایرانی مسلح افواج اسرائیل دے خلاف نویں فوجی کارروائیاں کرݨ سانگے پوری تیار اے۔ انہاں آکھیا جو اگر اسرائیل کوئی تزویراتی غلطی کیتی تاں اوں کوں مناسب جواب ݙتا ویسی۔ ایں توں پہلے اسرائیل اڄوکے ڈینہاں اچ اے اشارہ ڈیندا پئے جو اگر امریکا نال مذاکرات ایران دے ایٹمی پروگرام کوں روکݨ اچ ناکام رہیے تاں او ایران دی جوہری تنصیبات کوں نشانہ ٻݨیسی۔
