اسلام آباد۔27مئی (اے پی پی) وفاقی وزیر خزانہ اَتے محصولات سینیٹر محمد اورنگزیب آکھیا جو معیشت دی ڈیجیٹلائزیشن پاکستان دے اقتصادی مستقبل دا ہک بنیادی ستون اے، ڈیجیٹل ادائیگیاں نال مالی شفافیت، شمولیت اَتے کارکردگی کوں ودھارا مل ویسی۔ انہاں اے گالھ سنوار کوں اتھاں ملک کوں ڈیجیٹل اَتے ڳھٹ نقدی تے مبنی معیشت ول گھن ونڄݨ کیتے مختلف تجویزاں بارے تھیوݨ آلے اجلاس توں خطاب کریندیں ہوئیں آکھی۔ اجلاس اچ ملک دے مالیاتی شعبے دے سرکردہ نمائندے شریک ہن، جنہاں اچ کمرشل بینکاں، ڈویلپمنٹ فنانس اداریاں، ریگولیٹرز اَتے سرمایہ کاری دے ماہرین شامل ہن۔ اے ماہرین ایں خصوصی کمیٹی دا حصہ ہن جیڑھی وزیر خزانہ دی ہدایت تے بݨائی گئی اے تاں جو ڈیجیٹل معیشت دی راہ ہموار کرݨ کیتے قابل عمل سفارشات تیار کیتیاں ونڄ سڳݨ۔ اجلاس اچ ڈیجیٹل ادائیگیاں دے ودھارے کیتے کئی اہم تجویزاں تے تفصیلی ڳالھ کیتی ڳئی۔ اجلاس اچ ایں گالھ تے اتفاق کیتا گیا جو ملک بھر اچ ڈیجیٹل مالیاتی خدمتاں تئیں سوکھی رسائی کوں یقینی بݨایا ونجے تاں جو عام شہری اَتے کاروباری ادارے نقدی دی بجائے ڈیجیٹل لین دین، خاص کر راست (Raast) سویں فوری ادائیگی نظام کوں مزید ودھاون اَتے مختلف ڈیجیٹل پلیٹ فارمز وچال آپسی رابطے کوں بہتر بݨایا ونجے تاں جو صارفین کوں ودھ سوکھ اَتے چون دے موقع مل سڳݨ۔ اجلاس اچ ڈسایا گیا جو ڈیجیٹل ادائیگیاں کوں ٻیا پرکشش بݨاوݨ کیتے موجودہ مراعاتی نظام اچ توازن ضروری اے۔ نِکے تاجراں اَتے پسماندہ طبقیاں تئیں رسائی ودھاوݨ کیتے مرچنٹ سروسز، ادائیگی دے ڈھانچے اَتے بئے اخراجات اچ ڳھٹکی کوں ترجیح ݙتی ویسی۔ وزیر خزانہ کمیٹی دی تجویزاں کوں سراہندے ہوئیں آکھیا جو معیشت دی ڈیجیٹلائزیشن پاکستان دے اقتصادی مستقبل دا ہک بنیادی ستون اے۔ انہاں آکھیا جو ڈیجیٹل ادائیگیاں نال مالی شفافیت، شمولیت اَتے کارکردگی کوں ودھارا مل ویسی اَتے اے قدم معیشت دی پائیداری، مسابقت اَتے جامع ترقی کیتے لازمی اے۔ انہاں آکھیا جو ڈیجیٹل نظام جدید مالیاتی ڈھانچے دی بنیاد اے۔ اساکوں جلدی اَتے مربوط انداز اچ ایہو جیہا ماحول بݨاوݨا ہوسی جتھاں ہر پاکستانی شہری سوکھے اَتے محفوظ طریقے نال ڈیجیٹل ادائیگیاں کر سڳے۔ وزیر خزانہ کمیٹی کوں ہدایت کیتی جو او ایں تجویزاں تے عملدرآمد کیتے ہک واضح اَتے نظام الاوقات تے مبنی لائحہ عمل تیار کرے، جیڑھا وزارت خزانہ کوں پیش کیتا ویسی تاں جو انہاں تے پالیسی سطح تے مزید کارروائی کیتی ونڄ سڳے۔
