لاہور۔27مئی(اے پی پی)پاکستان اَتے بنگلہ دیش وچال ترائے میچاں دی ٹی ٹوینٹی انٹرنیشنل سیریز بدھ 28 مئی توں قذافی اسٹیڈیم لاہور اچ شروع تھیسی۔ سیریز دے باقی ݙوہیں میچ وی لاہور اچ 30 مئی اَتے ہک جون کوں کھیݙے ویسن۔ اے میچز پاکستانی وقت دے مطابق رات 8 وجے شروع تھیسن۔ پاکستان ٹیم دی قیادت آل راؤنڈر سلمان علی آغا کریسن جݙاں جو بنگلہ دیش ٹیم دی قیادت وکٹ کیپر بیٹر لٹن داس کریسن۔ بنگلہ دیش 2020 اچ وی پاکستان دا دورہ کیتا ہا اتے چار ٹی ٹوینٹی میچاں اچوں ترائے پاکستان جیتئے ہن اتے ہک مینہ پاروں منسوخ تھی ڳیا ہا۔ پاکستانی کپتان سلمان علی آغا آکھیے جو ٹیم ہک شاندار پریکٹس سیشن کیتے اَتے کھڈاری ہک یونٹ دے طور تے زبردست کارکردگی ݙکھیندے پئن، ساݙے کئی کھڈاریاں ایچ بی ایل پی ایس ایل اچ شاندار کارکردگی ݙکھائی اے، جیڑھا دنیا دے سَبھ توں ودھ مسابقتی ٹی ٹوئنٹی ٹورنامنٹس اچوں ہک اے، اساں ایں فارم اَتے مومینٹم کوں ایں سیریز اچ گھن ونڄݨ چاہندے ہیں۔ انہاں آکھیا جو بنگلہ دیش ہک باصلاحیت ٹیم اے اَتے انہاں دے خلاف چنگی کرکٹ ݙیکھݨ کوں ملسی۔ بنگلہ دیشی کپتان لٹن داس آکھیے جو لاہور پڄݨ دے بعد ٹیم دا ٹریننگ سیشن بہوں چنڳا رہے۔ پاکستان دے چیلنج کوں سمجھدے ہیں، اے سیریز نینگراں کیتے اڳو تے ودھݨ دا بہترین موقع ݙیسی۔ ٻئے پاسو پاکستان کرکٹ بورڈ (پی سی بی) سیریز کیتے کمنٹری پینل دا اعلان کیتے، جیندے اچ سابق ٹیسٹ کپتان عامر سہیل اَتے رمیز راجہ، ٹیسٹ کرکٹر بازید خان، بنگلہ دیش دے سابق انٹرنیشنل کرکٹر اطہر علی خان اَتے مائیک ہیزمین شامل ہین۔ زینب عباس سیریز دی پریزنٹر ہوسن۔ سیریز دے میچز پاکستان اچ اے سپورٹس اَتے ٹین سپورٹس تے براہ راست نشر کیتے ویسن، جݙاں جو تماشا اَتے ٹیپمیڈ ایپس تے وی میچز براہ راست ݙیکھے ونڄ سڳسن۔
