لاچین۔28مئی (اے پی پی) وزیراعظم محمد شہباز شریف آکھیا جو پاکستان، ترکیہ اَتے آذربائیجان اعلیٰ اقدار، امن اَتے انصاف سانڳے ہک ٻئے دے نال کھڑن، سہ فریقی اجلاس اساکوں ہک سوئی نال اڳوں ودھݨ دا موقع ݙیندے، اساں امن چاہندوں اَتے بھارت نال سارے تنازعات مذاکرات نال حل کرݨ چاہندوں، بھارت پاکستان دا پاݨی روکݨ اچ کݙاہیں کامیاب نہ تھیسی۔ اے ڳالھیں انہاں بدھ کوں پاکستان، ترکیہ اَتے آذربائیجان سہ فریقی اجلاس توں خطاب کریندیں ہوئیں آکھی۔ وزیراعظم آکھیا جو آذربائیجان دے صدر الہام علیوف اَتے آذری عوام کوں یوم آزادی تے مبارکباد پیش کرینداں، آذری قوم بھرپور جدوجہد نال دنیا اچ نمایاں مقام حاصل کیتے۔ انہاں آکھیا جو ترکیہ دے صدر رجب طیب اردوان کوں پی کے کے دا مسئلہ خوش اسلوبی نال حل کرݨ تے مبارخ ݙینداں، اے وݙی سفارتی کامیابی اے، ایندے نال نہ صرف خطے بلکہ ایندے توں ٻاہر وی ترکیہ دے اثر و رسوخ اچ ودھارا تھیا۔ وزیراعظم آکھیا جو آذربائیجان اچ بھرپور استقبال اَتے میزبانی تے صدر الہام علیوف دا شکر گزار ہاں، اڄ دا اجلاس ترائے حقیقی دوست ملکاں دے خلوص دا مظہر اے، اساݙے دل خوشی نال بھریے پئن، گزریل سال مئی اچ آستانہ اچ سہ فریقی اجلاس تھیا جیندے اچ آپسی مفاد دے شعبیاں تے مفید ڳالھ مہاڑ تھئی ہئی، اڄ اساں ایں سہ فریقی شراکت داری کوں نویاں بلندیاں تے ڳھن ونڄݨ دے عزم کریندوں جیڑھا جو اساݙے عوام دیاں خواہشاں دے مطابق اے۔ وزیراعظم آکھیا جو پاکستان، آذربائیجان اَتے ترکیہ تاریخی، ثقافتی اَتے مذہبی تعلقات اچ جڑے ہن اَتے ڈہاکیاں پراݨیاں مشترکہ اقدار رکھیندن اَتے ہک ٻئے دی حمایت کریندن۔ وزیراعظم آکھیا جو اساں ہک ٻئے دے کٹھے کھڑوں، چاہے اے کاراباخ، کشمیر اَتے شمالی ترکیہ قبرص دا مسئلہ ہووے، اساݙی یکجہتی اَتے آپسی احترام اساݙی طاقت اے، اے قدرتی ڳالھ اے کیونجو اساݙے عوام ایندی بھرپور حمایت کریندے ہن اَتے ایندا اظہار ترکیہ اَتے آذربائیجان سانڳے محبت نال تھیندے۔ وزیراعظم آکھیا جو اڄوکی پاک بھارت کشیدگی اچ بھارت نام نہاد پہلگام واقعہ بارے پاکستان دے خلاف کوئی وی ثبوت پیش کرݨ اچ ناکام رہیا بلکہ اساݙی غیر جانبدارانہ اَتے شفاف تحقیقات دی پیشکش کوں مسترد کر ݙتا۔ وزیراعظم آکھیا جو دنیا کوں مسلح تنازعات، موسمیاتی تبدیلیاں، بیماریاں اَتے معاشی بحران سودھا بہوں چیلنجز دا سامݨا اے، ایں تناظر اچ اے ترائے مثالی ملک اتھاں کٹھے تھئن، اساں ہمدردی دی امید رکھیندوں اَتے تنازعات کوں مسترد کریندوں، اساں پرامید ہئیں جو صبر و تحمل اَتے دانشمندی نال امن تے خوشحالی امسی۔ وزیراعظم شہباز شریف آکھیا جو غیر متوقع اَتے غیر مستحکم دنیا اچ سیاسی استحکام دی تعمیر، ہم آہنگی کوں ودھاوݨ اَتے ابھردیاں ہوئیاں ٹیکنالوجیز نویاں حقیقتیاں کوں جنم ݙیندی پئن، موجودہ صورتحال اچ ڈو برادر ملک ترکیہ اَتے آذربائیجان اساݙے نال کھڑے ہن جیڑھی جو خوش قسمتی دی ڳالھ اے، اساں انہاں تے بغیر کہیں ہچکچاہٹ دے اعتماد کریندوں، اتحاد، امن، انصاف اَتے اخلاقیات سانڳے اساݙے دروازے ہمیشہ کھلے ہن۔ وزیراعظم آکھیا جو اساݙے آزمودہ تعلقات نہ صرف اساݙے آپݨی عوام بلکہ خطے اَتے ایندے توں ٻاہر امن تے خوشحالی سانڳے مفید ہوسن۔ وزیراعظم آکھیا جو اے سہ فریقی اجلاس اساں ساریاں سانڳے بروقت اَتے انتہائی اہمیت دا حامل اے، ایندے نال اساکوں ضروری سیاسی عزم اَتے مختلف شعبیاں اچ اجتماعی اَتے کثیریت نال اڳوں ودھݨ دا موقع ملیے ۔ وزیراعظم آکھیا جو اڄوکے پاک بھارت تنازعہ سنگین ہئی، بھارت پاکستان دے خلاف بلاجواز جارحیت کیتی اَتے پاکستان تے حملہ کیتا، ترکیہ دے صدر رجب طیب اردوان اَتے آذربائیجان دے صدر الہام علیوف پاکستان عوام نال بھرپور یکجہتی اَتے غیر متزلزل حمایت دا مظاہرہ کیتا جیڑھا جو قابل تعریف اے اَتے ایں تے میں، حکومت پاکستان اَتے پاکستانی عوام انہاں دے شکر گزار ہن، اساں ہمیشہ انہاں ݙوہاں ملکاں دے شکر گزار رہسوں۔ وزیراعظم آکھیا جو فیلڈ مارشل سید عاصم منیر مسلح افواج دی قیادت کیتی، انہاں بہادری نال مقابلہ کیتا اَتے اعلیٰ ترین پیشہ وارانہ مہارت دا مظاہرہ کیتا، پوری پاکستانی قوم مسلح افواج دے کٹھے کھڑی ہئی، اے بے خوف، نڈر اَتے آہنی عزم دا صبر و تحمل نال اظہار ہئی جیندے ذریعے بھارتی جارحیت دا مقابلہ کیتا ڳیا، اللہ تعالیٰ دے فضل، پاکستانی عوام اَتے دوست ملکاں دی حمایت نال اساں فتح حاصل کیتی۔ وزیراعظم آکھیا جو اساں خطے اچ امن چاہندوں اَتے ہمیشہ امن دے خواہاں رہسوں، ایں سانڳے مذاکرات ضروری ہن اَتے فوری توجہ طلب تنازعات جیڑھے جو مقبوضہ کشمیر دا اقوام متحدہ دی سلامتی کونسل دیاں قرارداداں اَتے کشمیری عوام دیاں خواہشاں دے مطابق حل، پاݨی دا مسئلہ اے، بدقسمتی نال بھارت سندھ طاس معاہدہ کوں ہتھیار دے طور تے استعمال کرݨ شروع کر ݙتے، اے پاکستانی عوام سانڳے زندگی دا معاملہ اے، 24 کروڑ عوام ایں پاݨی کوں زراعت سودھا بئے مقصد سانڳے استعمال کریندن، اے بدقسمتی اے جو بھارت اساݙے دریاواں اچ وھݨ آلے پاݨی کوں روکݨ دی دھمکی ݙیندا پئے، اے کݙاہیں وی ممکن کائینی اَتے نہ تھیسی، اساں ایں ڳالھ کوں یقینی بݨاوݨ سانڳے اقدامات کریندے پئیوں جو بھارت کݙاہیں ایویں نہ کر سڳسی۔ وزیراعظم آکھیا جو جے بھارت مخلص تھی تے انسداد دہشت گردی تے ڳالھ کرݨ چاہندے تاں پاکستان بھارت نال ایں معاملہ تے وی ڳالھ مہاڑ سانڳے تیار اے، اساں دنیا اچ دہشت گردی توں ساریں توں ودھ متاثرہ ملک ہئیں، دہشت گردی دے خلاف جنگ اچ 90 ہزار توں ودھ پاکستانی شہید تھئن، 150 ارب ڈالر توں ودھ دا معاشی نقصان تھئے، ایں لعنت کوں شکست ݙیوݨ سانڳے ایندے توں وݙے عزم دی کوئی مثال نہ تھی سڳدی، پاکستان بھارت نال تجارت دے ودھارے سودھا سارے ضروری مسئلیاں تے مذاکرات سانڳے تیار اے۔
