لاچین۔28مئی (اے پی پی) وزیراعظم محمد شہباز شریف آکھیا جو آرمینیا دے خلاف جنگ اچ پاکستان تے ترکیہ آذر بائیجان دی بھرپور سیاسی تے سفارتی حمایت کیتی، پاکستان، ترکیہ تے آذر بائیجان ہک جان اتے ترائے قالب ہن، پاکستان جدید جنگی ہتھیاراں تے ٹیکنالوجی نال لیس آپݨے توں کئی گنا وݙے دشمن کوں چند لمحیں اچ شکست ݙتی، ترائے پاسے دی بیٹھک انتہائی تعمیری تے مفید رہی، عوام دی ترقی تے خوشحالی کیتے رَل تے کم کریندے رہسوں، مسئلہ کشمیر اقوام متحدہ دی سلامتی کونسل دیاں قرارداداں دے مطابق حل کیتا ونجے، غزہ اچ فوری جنگ بندی تے فلسطینیاں تے ظلم بند کیتے ونجن۔ اے ڳالھیں انہاں آذر بائیجان دے یوم آزادی دی تقریب توں خطاب کریندیں ہوئیں آکھی۔ تقریب نال آذر بائیجان دے صدر الہام علییوف تے ترکیہ دے صدر رجب طیب اردوان وی خطاب کیتا۔ تقریب اچ فیلڈ مارشل سید عاصم منیر، نائب وزیراعظم تے وزیر خارجہ اسحاق ڈار، وفاقی وزیر اطلاعات تے نشریات عطا اللہ تارڑ تے وزیراعظم دے معاون خصوصی طارق فاطمی شرکت کیتی۔ ایں موقع تے پاکستان، ترکیہ تے آذر بائیجان دے قومی ترانے وی وڄائے ڳئے۔ وزیراعظم شہباز شریف آکھیا جو اڄ اساں آذربائیجان دا یوم آزادی تے پاکستان دا یوم تکبیر منیندے پئیوں جڈاں 28 مئی 1998ء کوں پاکستان ایٹمی طاقت ٻݨیا، ایں یوم آزادی دی تقریب اچ شرکت باعث مسرت تے اعزاز اے، آذر بائیجان دے صدر الہام علییوف تے آذری قوم کوں یوم آزادی دی مبارخ پیش کرینداں، صدر الہام علییوف دی عظیم قیادت تے دانشمندانہ وژن نال 30 سال بعد کاراباخ کوں آزادی ملی، آذر بائیجان دیاں فوجاں بہادری نال جنگ لڑی، اساں ایں جنگ اچ شہید تھیوݨ آلیاں کوں خراج عقیدت پیش کریندوں اتے بہادری تے بلند حوصلیاں دا مظاہرہ کرݨ آلے غازیاں کوں خراج تحسین پیش کریندوں ۔ انہاں آکھیا جو ایں جدوجہد اچ ترکیہ دے صدر رجب طیب اردوان تے ترکیہ دی عوام آذر بائیجان دی بھرپور حمایت کیتی تے حوصلہ ودھایا، ایں اوکھ اچ ترکیہ دی حمایت بہترین ہئی، پاکستان وی ایں عظیم مقصد کیتے آپݨا بھرپور کردار ادا کیتا تے برادر ملک دی سیاسی تے سفارتی حمایت کیتی۔ انہاں آکھیا جو اساں ہک جان تے ترائے قالب ہیسے۔ انہاں آکھیا جو پاکستان آپݨے توں کئی گنا وݙے دشمن کوں کجھ عرصے پہلے شکست ڈتی جیڑھا جو آبادی تے معیشت دے لحاظ نال کئی گنا وݙا اے، ایں کئی ݙھاکیاں اچ ارباں ڈالر دنیا دے جدید ترین ہتھیار، جنگی جہاز تے جدید ٹیکنالوجی ڳھنݨ تے خرچ کیتے، 22 اپریل کوں مقبوضہ کشمیر دے علاقے پہلگام وچ افسوسناک واقعہ تھیا، بدقسمتی نال بھارت فوری طور تے پاکستان تے کوڑا الزام لاتا اتے حقائق مسخ کرݨ دی کوشش کیتی تے دنیا کوں اے سنیھا ݙتا جو پاکستان ایں نام نہاد واقعے وچ ملوث اے۔ انہاں آکھیا جو اساں فوری طور تے ایں واقعے دی شفاف تے قابل اعتماد تحقیقات کیتے بین الاقوامی انکوائری کمیشن ٻݨاوݨ دی تجویز پیش کیتی لیکن بھارت پاکستان تے حملہ کر ݙتا، بالاں تے تریمتاں سودھا 33 معصوم پاکستانیاں کوں شہید کیتا، اساں بھارتی حملے اچ شہید تھیوݨ آلے 6 سالہ بال دی نماز جنازہ اچ شرکت کیتی، ایں حملے اچ 55 پاکستانی زخمی تھئے۔ وزیراعظم آکھیا جو اساں 9 تے 10 مئی دی رات کوں بھارتی جارحیت دا نپا تلا جواب ڈیوݨ دا فیصلہ کیتا، اساں دفاع وطن کیتے ایندا جواب ݙتا۔ انہاں آکھیا جو چند لمحیں اچ اساڈیاں بہادر فوجاں 6 بھارتی جنگی جہاز مار سٹیے جنہاں اچ چار رافیل طیارے وی شامل ہن، اساں بھارتی ڈرونز وی سٹین۔ انہاں آکھیا جو اساں بھارت کوں سنیھا ݙتا جو پاکستان پرامن ملک اے، خطے اچ امن، خوشحالی تے ترقی دا فروغ چاہندوں جڈانجو اساں بھارتی جارحیت دا منہ ٻھن جواب ڈتا۔ انہاں آکھیا جو بھارت براہموس میزائل نال پاکستان اچ کئی جہیں تے حملے کیتے، فیلڈ مارشل سید عاصم منیر غیر متزلزل اعتماد دا اظہار کیتا تے انہاں دی قیادت وچ پاکستان دیاں مسلح فوجاں دشمن کوں تاریخی سبق سکھایا۔ شہباز شریف آکھیا جو اساں بھارتی فوجی تنصیبات تے حملے کیتے جڈاں جو انہاں اساڈے معصوم شہریاں کوں نشانہ ٻݨایا، اے اساڈے تے بھارت وچال واضح فرق اے۔ انہاں آکھیا جو بھارت پاکستان دے نال جنگ بندی کیتے رابطہ کیتا، اللہ تعالیٰ اساں کوں عظیم فتح ݙتی اتے اساں بھارت دی جنگ بندی دی درخواست قبول کیتی۔ انہاں آکھیا جو جڈاں آرمینیا آذر بائیجان تے حملہ کیتا تاں پاکستان، ترکیہ تے آذر بائیجان چٹان وانگوں کھڑے ہن، جڈاں بھارت پاکستان تے حملہ کیتا تاں ترک صدر رجب طیب ایردوان، ترک قوم تے آذر بائیجان دے صدر الہام علییوف تے آذری قوم پاکستان دے نال مضبوطی نال کھڑے ہن تے پاکستان نال مکمل یکجہتی دا اظہار کیتا، ترائے برادر ملکاں دا اتحاد تاریخی لمحہ اے، اساں مشکل دی ایں گھڑی اچ حمایت تے یکجہتی کوں کڈاہیں نئیں بھل سڳدے، ایں بھائی چارے تے دوستی تے شکریہ ادا کرینداں۔ انہاں آکھیا جو ترائیں پاسے دی بیٹھک دا اج ݙوجھا مرحلہ تھیا، ایں ترائے پاسے دی بیٹھک اچ اساں جئیں تے گالھ مہاڑ کیتی تے جیڑھے فیصلے کیتے ایں تناظر اچ اے بیٹھک ٻہوں تعمیری تے متاثر کن رہی۔ انہاں آکھیا جو ترائے دوست ملکاں دے جھنڈے کٹھے لہریندے پئن جیڑھا اساݙے وچال اتحاد، آپݨی عوام کیتے امید، یگانگت، آپݨے تعلقات کوں بلندی تے گھن ونڄن تے مسلم امہ دی ترقی تے خوشحالی دے عزم دا عکاس اے۔ انہاں آکھیا جو تنازعہ جموں تے کشمیر کاز تے ترکیہ تے آذر بائیجان دی حمایت تے شکرگزار ہیسے، کشمیر دی سوھݨی وادی کشمیریاں دے خون نال رنگین اے، بھارتی بربریت تے ظلم دے خلاف جدوجہد آزادی کئی سالاں توں جاری اے، کشمیریاں کوں اقوام متحدہ دی سلامتی کونسل دیاں قرارداداں تے انہاں دی خواہشات دے مطابق انہاں دا بنیادی حق حق خود ارادیت نئیں ݙتا ویندا پیا، پاکستان کشمیریاں دے کاز دے نال غیر متزلزل عزم نال کھڑے، کشمیریاں کوں جلدی آزادی ملسی تے او غلامی توں آزاد تھیسن۔ انہاں آکھیا جو غزہ آچ تریمتاں تے ٻالاں سودھے 52 ہزار توں ودھ فلسطینی شہید تھی ڳئن، مہذب دنیا ایں تباہی تے کݙاں جاگسی، اسرائیلی جارحیت تے ظلم دی بھرپور مذمت کریندوں، ترکیہ دے صدر رجب طیب ایردوان دی عالمی سطح تے قیادت کوں دنیا مندیندی پئی اے، انہاں انسانیت دے مسائل دے حل کیتے اہم کردار ادا کیتا، اڄ ترکیہ، پاکستان تے آذر بائیجان کوں غزہ اچ جنگ بندی کیتے رَل تے آواز چاوݨی چاہیدی اے، غزہ اچ انسانیت سوز اقدامات بند کیتے ونجن، ݙو ریاستی حل دے تحت فلسطینیاں کوں حق خود ارادیت ݙتا ونجے جئیں کوں پوری دنیا تسلیم کریندی اے۔
