“معرکہ حق” دی کامیابی ساݙے قومی عزم اتے ساریاں قومی قوتاں وچال مکمل ہم آہنگی دا منہ بولیندا ثبوت اے، آرمی چیف فیلڈ مارشل سید عاصم منیر دا کمانڈ اینڈ سٹاف کالج کوئٹہ اچ خطاب

راولپنڈی۔30مئی (اے پی پی)آرمی چیف فیلڈ مارشل سید عاصم منیر آکھیے جو “معرکہ حق” دی کامیابی ساڈے قومی عزم اتے ساریاں قومی قوتاں وچال مکمل ہم آہنگی دا منہ ٻولیندا ثبوت اے، پاکستان کوں کݙاہیں دبایا نہیں ونڄ سڳدا، پاکستان دی انسداد دہشت گردی دی کوششاں کوں سبوتاژ کرݨ آلے مذموم عزائم کوں پوری قوت نال ناکام بݨایا ویسی۔ اے ڳالھ آرمی چیف فیلڈ مارشل سید عاصم منیر نشان امتیاز (ملٹری) کمانڈ اینڈ سٹاف کالج کوئٹہ دے دورے اچ آکھی جتھاں انہاں سٹوڈنٹ افسراں اتے فیکلٹی نال خطاب کیتا۔آپریشن ’بنیان مرصوص‘ دے شہداء کوں شاندار خراج تحسین پیش کریندے، انہاں دے خانداناں نال مکمل یکجہتی کریندے ہوئیں آرمی چیف آکھیا جو قومی قیادت دے زیر سایہ پاکستانی عوام مادر وطن دے دفاع کیتے فولادی دیوار بݨ ڳئن۔ پاک فوجاں دی پیشہ ورانہ صلاحیتاں کوں سراہندے ہوئیں آرمی چیف اعادہ کیتا جو “معرکہ حق” دی کامیابی اساڈے قومی عزم اتے ساریاں قومی قوتاں وچال مکمل ہم آہنگی دا منہ ٻولیندا ثبوت اے۔ عالمی اتے علاقائی صورتحال تے الیندے فیلڈ مارشل ابھردے تنازعات دی نوعیت تے الایا اتے خاص کر بھارت ولوں پاکستان دے خلاف بلااشتعال فوجی جارحیت دے ودھدے رجحان کوں خطرناک قرار ݙتا۔ کہیں وی قسم دی جارحیت کوں شکست ݙیوݨ دے عزم اتے مکمل صلاحیت دا اظہار کریندے آرمی چیف واضح کیتا جو پاکستان کوں کݙاہیں دبایا نئیں ونڄ سڳدا اتے پاکستان دی انسداد دہشت گردی دی کوششاں کوں سبوتاژ کرݨ آلے مذموم عزائم کوں پوری قوت نال ناکام بݨایا ویسی۔ جنوبی ایشیا اچ سٹریٹجک استحکام کیتے انہاں اقوام متحدہ دے تسلیم شدہ دیرینہ مسئلہ کشمیر دے پرامن حل دی لوڑھ تے زور ڈتا اتے بھارت ولوں نام نہاد ‘آبی دہشت گردی’ کوں غیرقانونی اتے ناقابل قبول قرار ڈیندے خبردار کیتا۔ بھارت دی ریاستی سطح تے پاکستان دے اندرو دہشت گردی دی پشت پناہی دے کردار کوں اڳونہا کریندے آرمی چیف ملک گیر انسداد دہشت گردی مہم کوں ہک نویں روح نال جاری رکھݨ دا عزم دوہرایا اتے یقین ڈیوایا جو دہشت گردی دیاں ساریاں قسماں اتے مظاہر دے خلاف قومی جنگ اپݨے منطقی انجام اتے کامیابی تئیں ضرور پڄسی۔ قیادت دے موضوع تے ڳالھ کریندے ہوئیں فیلڈ مارشل زیر تربیت افسراں کوں مشورہ ڈتا جو او اپݨیاں ذمہ واریاں مکمل دیانت، جوش و جذبے اتے عزم نال ادا کرن۔ تخلیقی سوچ اتے تحقیق دی اہمیت تے زور ڈیندے انہاں کمانڈ اینڈ سٹاف کالج کوئٹہ دیاں انہاں کوششاں کوں سراہیا جیڑھیاں او آئندہ دے فوجی قائدین دی اعلیٰ پیشہ ورانہ تربیت کیتے کریندے پئن۔ انہاں آکھیا جو تربیت نہ صرف موجودہ حالات دی عکاسی کرے بھل ساکوں مستقبل دے میدان جنگ کیتے وی تیار کرے جیڑھا ہک اینڄھا میدان اے جیندے اچ پھرتی، اختراع اتے اٹل عزم دی لوڑھ اے۔ ایں توں پہلے کوئٹہ پڄݨ تے کمانڈر کوئٹہ کور اتے کمانڈنٹ کمانڈ اینڈ سٹاف کالج کوئٹہ انہاں دا استقبال کیتا۔