اسلام آباد۔31 مئی (اے پی پی) قومی ہیرو ارشد ندیم ایشیائی ایتھلیٹکس چیمپئن شپ اچ گولڈ میڈل جت تے قوم دا سِر ماݨ نال اُچا کرݙتے۔ فائنل مقابلے اچ ارشد ندیم اپݨی آخری تھرو 86.40 میٹر لمبی سٹی، جݙاں جو فائنل اچ بھارت دے سچن یادیو ݙوجھے نمبر تے رہین۔ اولمپک گولڈ میڈلسٹ جیولن تھرورارشد ندیم ایشیائی ایتھلیٹکس چیمپئن شپ اچ وی گولڈ میڈل گھن ڳھدا۔ جنوبی کوریا اچ تھیوݨ آلے چیمپئن شپ دے فائنل اچ پاکستان دے یاسر سلطان پہلی واری اچ 70.53 میٹر دی تھرو کیتی، یاسر دی ݙوجھی تھرو 75.39 میٹر دی رہی جݙاں جو تریجھی کوشش اچ یاسر سلطان 75.50 میٹر دی تھرو کیتی۔ پاکستان دے ارشد ندیم پہلی تھرو 75.64 میٹر دی سٹی جݙاں جو ݙوجھی کوشش اچ انہاں دی تھرو 76.80 میٹر دی رہی۔ ارشد ندیم تریجھی کوشش اچ 85.57 میٹر دی تھرو جݙاں جو چوتھی کوشش اچ 83.99 میٹر دی تھرو سٹی اتے گولڈ میڈل دے حقدار قرار پاتن۔ ایشیائی ایتھلیٹکس دی تاریخ اچ 1973 دے بعد پاکستان پہلا گولڈ میڈل جتیے۔ واضح رہے جو پاکستان ایں ایونٹ اچ 1973 اچ آخری واری گولڈ میڈل جتیا ہئی ۔ 1973 اچ فلپائن اچ تھیوݨ آلے مقابلیں اچ پاکستان جیولن تھرو اتے 800 میٹر ریس دے گولڈ جتئے جئیں اچ 800 میٹر ریس دا گولڈ محمد یونس اتے جیولن تھرو دا گولڈ میڈل اللہ داد جتیا ہئی، ارشد ندیم ایشیائی ایتھلیٹکس چیمپئن شپ اچ 50 سال توں ودھ عرصے بعد گولڈ میڈل جتݨ آلے پہلے پاکستانی دا اعزاز وی گھن ڳھدے۔
