اسلام آباد۔31 مئی (اے پی پی) پارلیمانی سیکرٹری برائے اطلاعات و نشریات بیرسٹر دانیال چوہدری پی ٹی آئی تے زور ݙتے جو تخریبی ہتھکنڈیں کوں ہک پاسے رکھو، قومی ترقی کیتے اجتماعی کوششاں دی لوڑھ اے، ملک دی وݙی بھلائی کیتے تعاون ودھایا ونڄے۔ ہک انٹرویو اچ انہاں پی ٹی آئی تے زور ݙتا جو اپݨے اختلافات کوں دفن کر ݙیو اتے تفرقہ انگیز سیاست کوں رد کر ݙیو کیون جو ٻاہرلے چیلنجز دا مقابلہ کرݨ کیتے قومی اتحاد ضروری اے۔ دانیال چوہدری آکھیے جو ٻاہرلے خطرے توں ملک دے دفاع کیتے متحد سیاسی موقف دی لوڑھ اے اتے ایں مقصد سانڳے پی ٹی آئی کوں اپݨے اختلافات کوں ہک پاسے رکھݨا چاہیدے۔ انہاں پی ٹی آئی تے تنقید کریندے ہوئیں آکھیے او اپݨے کماں کیتے مسلسل طور تے نامناسب ویلھے کوں چݨدی اے ۔ دانیال چوہدری آکھیے جو مسلم لیگ (ن) اتے ایندیاں اتحادی جماعتاں ہک نازک موڑ تے اقتدار اچ آئیاں ہن جݙاں ملک ڈیفالٹ کرݨ والا ہئی ، وزیراعظم محمد شہباز شریف دی سرشار قیادت اچ انہاں دی ٹیم دی کوششاں نال قوم ایں اوکھ توں نکلی اتے ہݨ ملک استحکام اتے معاشی بحالی آلے پاسے ودھدا پئے۔ دانیال چوہدری نشاندہی کیتی جو پی ٹی آئی دی اندرلی ونڈ پارٹی کوں کمزور کریندی پئی اے۔ انہاں پی ٹی آئی تے زور ݙتے جو ذاتی ایجنڈیاں تے اجتماعی مفادات کوں ترجیح ݙیندے ہوئیں سیاست اچ ودھ پکا تے مربوط انداز اختیار کرے۔ انہاں آکھیے جو مسلح افواج، قوم اتے حکومت دشمناں کوں ہک تکڑا سنھیا ݙتے جیڑھا پاکستان اپݨی خودمختاری اتے علاقائی سالمیت دے دفاع اچ متحد اے اتے قومی سلامتی تے کوئی سمجھوتہ نہ کریسی۔
