اسلام آباد۔31 مئی (اے پی پی) وفاقی وزیر داخلہ محسن نقوی دی صدارت اچ کاؤنٹر ٹیررازم کمیٹی اتے ہارڈن دی اسٹیٹ کمیٹی دا تریجھا اجلاس تھیا۔ اجلاس اچ غیر قانونی طورغیر ملکیاں دے خلاف آپریشن تکھا کرݨ دا فیصلہ کیتا ڳیا۔ ایں موقع تے ڳالھ کریندے وفاقی وزیر داخلہ آکھیے جو نادرا ایگزٹ پوائنٹس تے لائیو ڈیٹا ویریفکیشن دی سہولت ݙیسی، سارے اداریں کوں رل تے ون ڈاکومنٹ سسٹم کوں مکمل طور تے نافذ کرݨا ہوسی، ملک توں غیر قانونی سپیکٹرم مکاوݨ کیتے وفاقی و صوبائی اداریں کوں رل تے کم کرݨا ہوسی، بھکاری مافیا ملک دی بدنامی دا باعث بݨدا پئے انہاں نال سختی نال نبڑیا ونڄے، گداگری کوں ناقابل ضمانت جرم قرار ݙیوݨ ضروری اے۔ محسن نقوی ݙسائے جو بجلی چوری روکݨ کیتے وزارت توانائی اتے صوبائی حکومتاں کوں ہر ممکن تعاون ݙیندے پیوں۔ ایں موقع تے بریفنگ اچ ݙسایا ڳیا جو روزانہ دی بنیاد تے 250 توں ودھ انٹیلیجنس بیسڈ آپریشنز تھیندے پئن۔ وزارت توانائی ݙسایا جو وزارت داخلہ اتے صوبائی حکومتاں دے تعاون نال 142 ارب روپے دی ریکوری ممکن تھئی اے۔ اجلاس اچ تجاوزات دے آپریشنز اتے پاکستان پورٹ اتھارٹی دے قیام تے پیش رفت دا جائزہ ڳھدا ڳیا۔ اجلاس اچ گوادر سٹی دے سیف سٹی منصوبے اتے پروٹیکشن وال تے تھیوݨ آلی پیش رفت تے وی غور کیتا ڳیا۔ بریفنگ اچ ݙسایا ڳیا جو دریائے سندھ تے ڈیجیٹل انفورسمنٹ سٹیشنز دے قیام تے کم تھیندا پئے، موٹرویز اتے قومی شاہراواں تے مؤثر مانیٹرنگ کیتے انٹیلیجنٹ ٹرانسپورٹیشن سسٹم تے کم جاری اے۔ اجلاس غیر قانونی و سمگلڈ پٹرول روکݨ کیتے پٹرول پمپس دی ڈیجیٹلائزیشن تے پیش رفت دا وی جائزہ ڳھدا ڳئے۔ اجلاس اچ بریفنگ ݙتی ڳئی جو نویں قانون موجب کسٹمز اتے متعلقہ ڈپٹی کمشنر کوں پمپ سیل کرݨ اتے گاݙی ضبط کرݨ دا اختیارہوسی۔ وزیر مملکت داخلہ طلال چوہدری، وزیر قانون پنجاب صہیب احمد بھرت، مشیر اطلاعات خیبر پختونخوا بیرسٹر محمد علی سیف اتے وزیر داخلہ گلگت بلتستان اجلاس اچ شرکت کیتی۔ وفاقی سیکرٹری داخلہ، سارے صوبیں، آزاد کشمیر، گلگت بلتستان دے آئی جیز پولیس، سیکرٹریز داخلہ، وفاقی سیکرٹری داخلہ، ڈی جی ایف آئی اے، نیشنل کوآرڈینیٹر نیکٹا، چیف کمشنراسلام آباد، کوآرڈینیٹر نیشنل ایکشن پلان اتے سیکورٹی اداریں دے وݙے حکام وی اجلاس اچ شریک ہن۔
