گومی، جنوبی کوریا ۔31 مئی (اے پی پی) وزیر مملکت اتے معاون خصوصی وزیراعظم برائے ڈیجیٹل میڈیا فہد ہارون ارشد ندیم کوں ایشین ایتھلیٹکس چیمپئن شپ اچ گولڈ میڈل جتݨ تے دلوں مبارخ ݙیندے ہوئیں آکھیے جو ایں ہک تمغے توں ودھ کامیابی اے ۔ ارشد ندیم دی لگن تے عزم قوم دیاں امیداں دا مرکز اے، دل تے جذبے نال بھرپور انہاں دا سفر پاکستان دے جذبے دی عکاسی کریندے ، ارشد ندیم 240 ملین لوکاں دا سر ہک واری ول فخر نال اُچا کیتے ۔ انہاں آکھیے جو ارشد ندیم 86.40 میٹر دی بھرپور تھرو نال ہک واری ول تاریخ اچ آپݨا ناں لکھوائے۔ انہاں ایشین ایتھلیٹکس چیمپئن شپ اچ گولڈ جت تے نہ صرف ایشیا دے بہترین بلکہ صحیح معنیں اچ دنیا دے عظیم ترین ایتھلیٹس ہووݨ دا ثبوت ݙتے ۔ فہد ہارون آکھیے جو اولمپک دی شان توں گھن تے ایشیائی غلبے تئیں ارشد ندیم دا عروج نسلاں کوں متاثر کریندے ۔ انہاں دیاں کامیابیاں عالمی ایتھلیٹکس اچ پاکستان دی موجودگی کوں اُچا کریندیاں ہن اتے اساکوں او ساریاں کہانیاں یاد ݙویندن جیڑھیاں اساکوں متحد تے ترقی نال سرشار کریندن ۔ آپݨے پیغام دے چھیکڑ اچ انہاں ارشد ندیم کوں ایں ناقابل فراموش لمحے تے مبارخ ݙتی۔
