اسلام آباد ۔31مئی (اے پی پی) وفاقی وزیر برائے بحری امور محمد جنید انوار چوہدری سمندری معیشت دے ودھارے اتے بندرگاہواں تے ماحولیاتی پائیداری کوں یقینی بݨاوݨ سانڳے میری ٹائم چیمبر آف کامرس اینڈ انڈسٹری دے قیام دا اعلان کیتے ۔پاکستان بزنس کونسل فورم توں ہفتہ کوں کراچی اچ خطاب کریندے ہوئیں وفاقی وزیر آکھیےجو ماحولیاتی تبدیلیاں دے ودھدے چیلنجز بالخصوص گلوبل ساؤتھ اچ پائیدار ترقی دی وختی لوڑھ اے ۔انہاں آکھیے جو پاکستان دے ساحلی علاقے سمندری سطح دے اُچا تھیوݨ، شدید موسمی حالات اتے ماحولیاتی وڳاڑ جہیں خطریں توں ݙوچار ہن جیں دے پیش نظر ہک مخصوص پلیٹ فارم دا قیام ناگزیر تھی ڳئے ۔جنید چوہدری آکھیے جو میری ٹائم چیمبر نہ صرف بندرگاہواں، شپنگ، لاجسٹکس، ماہی گیری اتے سمندری خدمات جہیں شعبیاں کوں ہک جاہ کریسی بلکہ سرمایہ کاری، جدت اتے پائیداری تے مبنی ترقی کوں ودھارا ݙیسی ۔انہاں آکھیے جو اے چیمبر بندرگاہواں تے ماحولیاتی تحفظ، سبز ٹیکنالوجیز دے ودھارے اتے کاربن دے اخراج اچ کمی جہیں اقداماں کوں ترجیح ݙیسی ۔وزیر بحری امور عوام و نجی شعبے دے شراکت تے زور ݙیندے ماحولیاتی ماہرین، صنعتی قائدین اتے سول سوسائٹی دے نال رل تے قومی و عالمی ماحولیاتی اہداف گھنݨ دا عزم وی ظاہر کیتے ۔انہاں کاروباری برادری کوں یقین ݙیوائے جو انہاں دے خدشات کوں سنجیدگی نال گھدا ویندا پئے اتے ایں حوالے نال انہاں دی سندھ دے وزیراعلیٰ دے نال ملاقات وی تھئی اے تاں جو ہر سطح تے مربوط اقدامات کوں یقینی بݨایا ونڄ سڳے۔جنید چوہدری پاکستان دی بندرگاہی انفرااسٹرکچر دی جدید کاری دے منصوبے دی تفصیلات وی پیش کیتیاں، جیں اچ ڈیجیٹلائزیشن، مؤثر کارگو ہینڈلنگ اتے ماحولیاتی تحفظ کوں مرکزی حیثیت ݙتی ویندی پئی اے ۔پاکستان بزنس کونسل ایں اقدام دی تعریف کریندے آکھیا جو میری ٹائم چیمبر دا قیام ہک پائیدار اتے معاشی طور تے مضبوط سمندری معیشت دے پاسے اہم پیشرفت اے
