لاہور۔ 1 جون (اے پی پی) وزیراعلیٰ پنجاب مریم نواز شریف آکھیے جو ماء پیو دی اطاعت حکم خداوندی اَتے سنت رسولؐ اے، آپݨے ماء پیو دی خدمت فرض اول سمجھ تے کرو ۔ ماء پیو دے جگ ݙیھاڑ تے جاری سنھیے اچ انہاں آکھیے جو زندگی دی سخت دُھپ وچ ماء پیو ٹھڈی چھاں ہوندن، ماء پیو دی اطاعت اللہ تعالیٰ دا حکم، سنت رسولؐ اَتے مشرقی روایت اے، ماء پیو دی آپݨے ٻالاں کیتے محبت اَتے قربانیاں انسانی فطرت اَتے جبلت وچ شامل ہن۔ انہاں آکھیے جو ماء پیودے بغیر گھر صرف سلھاں دا مکان ہوندے اَتے ماء پیو دی موجودگی نال معمولی جیہا کمرہ وی جنت بݨ ویندے، ماء پیو ہی اولاد دی ہر کامیابی دی بنیاد رکھیندن۔ وزیراعلیٰ مریم نواز آکھیے جو میں اڄ جئیں مقام تے ہاں او شفقت بھریے ماء پیو دی تربیت اَتے دعائیں دا ثمر اے، ماء پیو دی بے لوث محبت میݙی زندگی دا انمول اثاثہ اے، آپݨے ماء پیو دی خدمت اَتے اطاعت کوں شرف سمجھدی ہاں، ماء پیو دی خدمت، عزت و احترام، اطاعت اَتے ݙیکھ بھال کوں فرض اول سمجھ کتے ادا کرو۔ دعا اے اللہ تعالیٰ سارے ٻالاں تے ماء پیو دی چھاں سلامت رکھے اَتے انہاں مزید آکھیے جو اڄ دے ݙینھ انہاں ٻالاں کوں وی یاد رکھو جنہاں دے ماء پیو وطن عزیز دی سلامتی تے قربان تھی ڳئے، میں انہاں ماء پیو کوں وی خراج تحسین پیش کریندی ہاں جنہاں دے ٻالاں جام شہادت نوش کیتا۔
