اسلام آباد۔ 1 جون (اے پی پی) وفاقی وزیر مذہبی امور و بین المذاہب ہم آہنگی سردار محمد یوسف آکھیے جو پاکستانی عازمین حج دیاں سہولتاں کیتے سعودی وزیر حج دی خصوصی توجہ باعث مسرت اے، سعودی حکومت ہر سال حج انتظامات وچ جدت اَتے نویاں سہولتاں متعارف کرویندی پئی اے، پاکستانی عازمین حج کوں کھاوݨ پیوݨ، ٹرانسپورٹ اَتے رہائش دیاں بہترین سہولتاں ݙتیاں ویندیاں پئن۔ وزارت مذہبی امور توں جاری اعلامیہ موجب ایہ ڳالھیں وفاقی وزیر سردار محمد یوسف سعودی وزیر حج و عمرہ ڈاکٹر توفیق بن فوزان الربیعہ نال ملاقات اچ آکھی۔ ایں موقع تے حج 2025 دے انتظامات تے ڳالھ مہاڑ کیتی ڳئی۔ سردار محمد یوسف پاکستانی عازمین حج کیتے بہترین سہولتاں تے سعودی وزیر حج توں اظہار تشکر کریندے آکھیے جو پاکستانی عازمین حج دی سہولت کیتے سعودی وزیر حج دی خصوصی توجہ باعث مسرت اے۔ انہاں آکھیے جو پاکستانی عازمین حج دی سہولت کیتے سعودی حکومت ہر سال حج انتظامات وچ جدت اَتے نویاں سہولتاں متعارف کرویندی پئی اے۔ انہاں آکھیے جو پاکستانی عازمین حج کوں کھاوݨ پوݨ، ٹرانسپورٹ اَتے رہائش دیاں بہترین سہولتاں ݙتیاں ویندیاں پئن، اڄوکے سال مشاعر مقدسہ وچ پاکستانی حاجیاں کوں نیڑے مکاتب ݙتے ڳئن۔ سردار محمد یوسف آکھیے جو آندے حج کیتے روڈ ٹو مکہ پراجیکٹ دا دائرہ کار پاکستان دے ٻئے شہراں تئیں ودھایا ویسی۔ ملاقات اچ سعودی وزیر حج و عمرہ ڈاکٹر توفیق بن فوزان الربیعہ آکھیے جو وزارت حج زائرین کوں ݙیجیٹل سسٹم دے ذریعے سہولتاں دی ݙیوݨ بہتر بݨاوݨ کیتے کوشش کریندی پئی اے۔ انہاں آکھیے جو منیٰ اَتے عرفات وچ پاکستانی عازمین حج کوں بہترین سہولتاں ݙتیاں ویسن، مشاعر مقدسہ وچ بہتر سہولتاں یقینی بݨاوݨ کیتے نجی کمپنیاں دی حوصلہ افزائی کریندے پیوں ۔ سعودی وزیر آکھیے جو پاکستان توں حاجیاں دی وݙی تعداد آندی اے، انہاں دی خدمت کرݨ اساں کیتے باعث شرف اے۔
