اسلام آباد۔1جون (اے پی پی) وفاقی وزیر صحت سید مصطفی کمال نرسنگ مافیا دے خلاف اعلان جنگ کریندے ہوئیں بدعنوانی کوں منڈھوں پٹݨ اتے شفافیت کوں یقینی بݨاوݨ کیتے سخت نویں قوانین گھن آوݨ دا عہد کیتے۔ اپݨے ہک انٹرویو اچ انہاں وضاحت کیتی جو نرسنگ مافیا جارحانہ طریقے نال نقلی ڈگریاں تے کم کریندا پئے، ہݨ ویلھا آ ڳئے جو انہاں دے خلاف سخت کارروائی تھیوے۔ انہاں اڳوں آکھیے جو بدعنوانی دے خلاف کریک ڈاؤن کرݨ دی لوڑھ اے تاں جو ایں ڳالھ کوں یقینی بݨایا ونڄ سڳے جو صرف اہل اتے پیشہ ور لوکاں کوں ای کم کرݨ دی اجازت ݙتی ونڄے۔ سید مصطفی کمال نرسنگ سیٹاں دی وݙی منگ تے روشنی پیندے آکھیے جو کجھ ادارے نرسنگ دی نوکری کیتے 25 لکھ جݙاں جو ملک اچ نوکری کیتے 9 لکھ روپے گھندن۔انہاں نرسنگ سیکٹر اچ انصاف اتے جوابدہی کوں یقینی بݨاوݨ کیتے شفاف اتے میرٹ تے مبنی نظام دی وختی لوڑھ تے زور ݙتا۔ وفاقی وزیر صحت آکھیے جو موجودہ حکومت نرسنگ دی تعلیم کوں بہتر بݨیسی۔ انہاں شفاف داخلیں اتے سخت میرٹ تے مبنی پالیسیاں دے عزم دا اظہار وی کیتا۔ وفاقی وزیر صحت دیاں ݙیکھ بھال دی خدمات دے ودھارے دے وسیع تر اقدامات معیاری دوائیاں دی وی ضمانت ݙیندن۔ وفاقی وزیر صحت سید مصطفی کمال صحت دے شعبے اچ بہتری کیتے حکومت دے عزم تے زور ݙیندے ہوئیں معیاری دوائیں دی دستیابی یقینی بݨاوݨ کیتے کوششاں دا یقین ݙیوائے۔
