اسلام آباد۔1جون (اے پی پی) وزیر اعظم محمد شہباز شریف اتے فیلڈ مارشل سید عاصم منیر آکھیے جو امن دے دشمناں کوں پاکستان دے اندر کم کرݨ دی کوئی جاہ کائناں ملسی، بلوچستان اچ بھارتی سپانسرڈ پراکسی وار ہݨ لُکی ہوئی کائنی، اے اساݙے عوام، اساݙی ترقی اتے اساݙے امن دے خلاف دہشت گردی دی کُھلی مذموم کارروائی اے، اساں کنے بلوچستان اچ سرگرم دہشت گرد نیٹ ورکس دے پچھوں بھارت دے ہتھ ہووݨ دے پکے ثبوت موجود ہن، دشمن دیاں اے مذموم کوششاں قوم نال رَل تے ناکام بݨیسوں۔ وزیر اعظم دفتر دے میڈیا ونگ توں جاری پریس ریلیز موجب کوئٹہ اچ زہری آڈیٹوریم اچ قبائلی عمائدین دے گرانڈ جرگے توں وزیراعظم محمد شہباز شریف اتے آرمی چیف فیلڈ مارشل سید عاصم منیر سانجھا خطاب کیتا۔جرگے دا اہتمام قبائلی قیادت نال ڳالھ مہاڑ اتے بلوچستان اچ سکیورٹی دی بدلدی صورتحال تے ڳالھ مہاڑ کیتی ڳئی ، ایندے اچ خاص طور تے بھارت ولوں جاری پراکسی جنگ تے توجہ ݙتی ڳئی ہئی۔وزیر اعظم ایں ڳالھ تے روشنی پاتی جو بلوچستان اچ ہندوستانی سرپرستی اچ کم کرݨ آلیاں پراکسیاں امن کوں خراب کرݨ، صوبے کوں غیر مستحکم کرݨ اتے حکومت پاکستان اتے مسلح افواج دی قیادت اچ ترقیاتی اقدامات کوں متاثر کرݨ دیاں اپݨیاں کوششاں تکھیاں کر ݙتن۔وزیر اعظم ایں ڳالھ تے زور ݙتا جو فتنہ الہندوستان جیھے دہشت گرد گروپ مقامی لوکاں دی حمایت چاہندن جیں توں انہاں کوں انکار کیتا ونجݨا چاہیدے۔عمائدین دی قیادت اتے تعمیری کردار دی تعریف کریندے ہوئیں وزیراعظم تلویں پدھر تے شمولیت اتے ایں ڳالھ کوں یقینی بݨاوݨ دی مسلسل لوڑھ دا اعادہ کیتا جو دہشت گرداں کوں کوئی سماجی جاہ نہ ملے۔دہشت گردی مخالف کوششاں دی کامیابی اتے لمبے عرصے دے امن و استحکام کیتے اے وݙا اہم ہئی۔وزیراعظم آکھیے جو امن دے دشمناں کوں پاکستان دے اندر کم کرݨ دی کوئی جاہ کائناں ملسی، انہاں کیتے اساݙا پیغام واضح اے، حکومت، مسلح افواج، قانون نافذ کرݨ آلے ادارے اتے انتظامیہ پاکستان دی مکمل حمایت نال، دہشت گردی دے خلاف قوم دی جنگ کوں ایندے منطقی انجام تئیں پڄیسن اتے دہشت گردی کوں فیصلہ کن انداز اچ شکست ݙیسن۔بلوچستان اچ خوشحالی کیتے یادگار ترقیاتی پیکجز دے سلسلے کوں اجاگر کریندے ہوئیں وزیراعظم عوام تئیں حکومتی اقدامات دے اثرات کوں یقینی بݨاوݨ دی لوڑھ تے زور ݙتا۔ وزیراعظم قومی یکجہتی دے تحفظ اچ بلوچستان دے عوام دے تاریخی کردار دی تعریف کیتی اتے انہاں تے زور ݙتا جو او بھارت ولوں منظم اتے سپانسر کیتی ڳئی غیر ملکی حمایت یافتہ تخریب کاری دے خلاف تکڑے رہن۔قبائلی عمائدین نال ڳالھ مہاڑ کریندے ہوئیں فیلڈ مارشل سید عاصم منیر آکھیے جو اے بھارتی سپانسرڈ پراکسی وار ہݨ لُکی ہوئی کائنی، اے اساݙے عوام، اساݙی ترقی اتے اساݙے امن تے چھیڑی ونڄݨ آلی دہشت گردی دی کُھلی مذموم کارروائی اے، اساݙے کنے بلوچستان اچ سرگرم دہشت گرد نیٹ ورکس دے پچھوں بھارت دے ہتھ ہووݨ دے پکے ثبوت موجود ہن، دشمن دیاں اے مذموم کوششاں قوم نال رَل تے ناکام تھی ویسن۔انہاں آکھیے جو بہادر بلوچ عوام، ملکی اتے غیر ملکی ہر اوں دشمن دا مقابلہ کریسن تے اینکوں کچل ݙیسن، جیڑھا اساݙی خودمختاری کوں چیلنج کرݨ دی ہمت رکھیندے۔فیلڈ مارشل سید عاصم منیر ایں ڳالھ تے زور ݙتا جو پاک فوج کہیں وی خطرے دا فیصلہ کن جواب ݙیوݨ کیتے پوری طرح تیار اے۔انہاں ایں ڳالھ دا اعادہ کیتا جو بلوچستان اچ امن تے کوئی سمجھوتہ کائنی تھی سڳدا اتے پاکستان دا مستقبل براہ راست ہک مستحکم، خوشحال بلوچستان نال جُڑیا ہویا اے۔وزیراعظم اتے فیلڈ مارشل بلوچستان اچ کم کرݨ آلیاں سیکیورٹی فورسز اتے قانون نافذ کرݨ آلے اداریاں دی بہادری اتے لچک دی وی تعریف کیتی۔ وزیراعظم شہداء دے گھر آلیں کوں مکمل تعاون اتے حمایت دا یقین ݙیوایا۔وزیر اعظم انہاں کوں یقین ݙیوایا جو دہشت گرداں، انہاں دے معاونین اتے سہولت کاراں کوں معاف کائناں کیتا ویسی۔جرگہ قبائلی عمائدین ولوں حکومت پاکستان اتے مسلح افواج نال مونڈھے نال مونڈھا رلا تے کھڑے تھیوݨ دے متفقہ عہد نال ختم تھیا اتے بلوچستان دی سلامتی، استحکام اتے ترقی کیتے اپݨے عزم دا اعادہ کیتا۔ایں توں پہلے وزیراعظم پاکستان کمانڈ اینڈ سٹاف کالج کوئٹہ دا وی دورہ کیتا تے کمانڈ اینڈ سٹاف کالج دے طالب علم افسراں اتے فیکلٹی نال خطاب کیتا۔وزیراعظم دا خطاب ریجنل اتے داخلی سلامتی دی ترقی وچال پاکستان دے دفاعی اداریاں کوں مضبوط بݨاوݨ کیتے حکومت دے گھاٹے عزم کوں ظاہر کریندے ۔آپݨی ڳالھ مہاڑ دے دوران وزیر اعظم ابھردے اتے ہائبرڈ خطرے دے پیش نظر پیشہ ورانہ مہارت، آپریشنل تیاری اتے تذویراتی دور اندیشی دی اہمیت کوں اجاگر کیتا، خاص طور تے بلوچستان جیھے حساس خطیں اچ، جِتھاں بھارتی سپانسر شدہ دہشت گرد پراکسی اساݙے لوکاں کوں نشانہ بݨیندن اتے اساݙی ترقی اتے خوشحالی کوں متاثر کرݨ چاہندن۔
