اسلام آباد۔ 1 جون (اے پی پی) وفاقی وزیرِ خزانہ اتے محصولات سینیٹر محمد اورنگزیب آئی پی ایس او ایس (اپسوس) دے ݙوجھی سہ ماہی 2025 دے صارف اعتماد سروے دے نتیجے دا خیرمقدم کریندے انہاں نتیجے کوں پاکستان وچ بہتر تھیندی ہوئی معاشی صورتحال اتے عوامی رجحانات دا واضح ثبوت قرار ݙتے۔ پریس ریلیز موجب، سروے مطابق صارفین دے اعتماد وچ نمایاں وادھا تھئے اتے ہݨ 42 فیصد پاکستانی اے یقین اتے اعتماد رکھیندن جو ملک درست صحیح پاسے اڳوں ودھدا پئے ، جیڑھا جو پچھلے چھ سال دے دوران ساریں توں اُچی سطح اے۔ سروے موجب ، معیشت کوں مستحکم سمجھݨ آلیں دی شرح وی اگست 2019 دے بعد سبھ توں اُچی سطح تے پُچ ڳئی اے۔ اے پہلا موقع اے جو صارف اعتماد دی نگرانی دے آغاز توں گھن تے ہݨ تئیں امید پسندی مایوسی تے سبقت حاصل کر ڳھدی اے، جیڑھا جو عوامی سوچ وچ اہم مثبت تبدیلی کوں ظاہر کریندے ۔ وزیرِ خزانہ سروے دے نتیجے کوں حوصلہ افزا قرار ݙیندے آکھیے اے نتیجے پچھلے 14 مہینے وچ حکومت دی مربوط اتے ذمہ دارانہ معاشی حکمتِ عملی دی کامیابی کوں ظاہر کریندن ۔ انہاں آکھیا حکومت مہانگ تے قابو پاوݨ، زرِ مبادلہ دی شرحِ تبادلہ کوں مستحکم کرݨ ، زرمبادلہ دے ذخیرے کوں بحال کرݨ اتے مالی نظم و ضبط کوں بہتر بݨاوݨ جیھے اہم اقدامات نال عوام دے اعتماد اتے معاشی بحالی سانڳے بنیاد ݙتی اے۔ وزیر خزانہ اے وی واضح کیتا جو وݙے حجم دی خریداری تے سرمایہ کاری دے حوالے نال صارفین دے اعتماد وچ وی پچھلے سال دی نسبت ݙوگنا وادھا تھئے ، جیڑھا جو ایں ڳالھ دی نشاندہی کریندے جو ہݨ گھرانے اپݨی مالی حالت دے بارے وچ پہلے توں ودھ پر اعتماد ہن۔ ایں طرح روزگار دے تحفظ دے حوالے نال وی اعتماد دی شرح 2019 دے بعد توں اپݨی سبھ توں اُچی سطح تے اے، جیڑھا جو روزگار دی صورتحال وچ بہتری اتے ترقیاتی پالیسیاں دے مثبت اثرات دا غماز اے۔ وزیرِ خزانہ آکھیے اپسوس سروے وچ نظر آوݨ آلا اعتماد صرف شہری علاقیاں تئیں محدود نئیں بلکہ دیہاتی علاقیں، نینگراں اتے تریمتیاں وچ وی نمایاں بہتری ݙکھائی ݙیندی پئی اے، جیڑھا جو ایں ڳالھ دا ثبوت اے معاشی بہتری وسیع بنیاداں تے تھیندی پئی اے۔ انہاں ایں اعتماد کوں حکومت دی نجی شعبے دی ترقی، برآمدات دے ودھارے، سماجی تحفظ دے اقدامات اتے مالی شمولیت کوں ودھاوݨ دیاں مسلسل کوششاں دا ثمر قرار ݙتا۔ سینیٹر محمد اورنگزیب ایں عزم دا اعادہ کیتا جو حکومت میکرو اکنامک استحکام کوں برقرار رکھݨ، ساختی اصلاحات کوں تکھا کرݨ اتے ایں ڳالھ کوں یقینی بݨاوݨ سانڳے پرعزم اے جو معاشی ترقی دے ثمرات سارے شہریاں تئیں ھکو سویں طور تے پڄن ۔ انہاں آکھیے آئی پی ایس او ایس سروے دے نتیجے پاکستان دے صحیح معاشی پاسے دا وختی ثبوت ہن اتے ایں ڳالھ دا واضح اشارہ ہن جو ملک پائیدار بحالی اتے مضبوطی دی راہ تے گامزن اے۔
