اسلام آباد (اے پی پی) نائب وزیراعظم اتے وزیر خارجہ سینیٹر محمد اسحاق ڈار پائیدار ترقی دے اہداف گھنݨ دے پروگرام دی 46ویں سٹیئرنگ کمیٹی دے اجلاس دی صدارت کیتی۔ نائب وزیراعظم دے دفتر توں جاری بیان موجب اجلاس ءچ وفاقی وزراء بین الصوبائی رابطہ، منصوبہ بندی و ترقی، بجلی اتے پارلیمانی امور دے علاوہ وزیراعظم دے معاون خصوصی ایم طارق باجوہ سودھے وفاقی سیکرٹریز، ارکان قومی اسمبلی اتے صوبائی حکومتاں دے نمائندے شامل تھئن۔اجلاس اچ ایگزیکیوٹنگ ایجنسیز دے نال بچتاں اتے موجودہ فنڈز دے استعمال دا جائزہ گھنݨ اتے جاری سکیمز کوں ویلھے سِر پورا کرݨ کوں یقینی بݨاوݨ کیتے عمل درآمد کوں ہموار کرݨ تے توجہ ݙتی ڳئی۔ نائب وزیراعظم مقررہ ویلھے دے اندر نتیجے ݙیوݨ دی لوڑھ تے زور ݙیندے موجودہ مالی سال دے مُکݨ توں پہلے مختص وسائل کوں پوری طرح استعمال کرݨ دی اہمیت تے زور ݙتا۔ انہاں سارے اسٹیک ہولڈرز کوں ویلھے سِر ترقیاتی اہداف کوں یقینی بݨاوݨ کیتے کوششاں تکھیاں کرݨ دی ہدایت کیتی۔ نائب وزیراعظم ترقی دیاں کوششاں کوں پائیدار ترقی دے اہداف نال ہم آہنگ کرݨ دے حکومت دے عزم دا ذکر کیتا تاں جو جامع اتے بامعنی پیشرفت تھیوے جیڑھی قوم دی ترقی دیاں ترجیحات کوں ݙکھاوے۔
