میدان عرفات۔ 5 جون (اے پی پی) مسجد الحرام دے امام شیخ ڈاکٹر صالح بن عبداللہ مسلماناں اُتے اللہ اَتے اُوندے رسول ﷺ دیاں تعلیمات اُتے عمل کرݨ اَتے تقویٰ اختیار کرݨ تے زور ݙیندے ہوئیں آکھیے جو تقویٰ دنیا تے آخرت دی بھلائی دا سبب اے۔ میدان عرفات وِچ مسجد نمرہ وِچ خطبہ حج ݙیندے انہاں پرہیزگاری اَتے تقویٰ دی اہمیت اُتے روشنی پیندے آکھیے جو تقویٰ اختیار کرݨ ایمان آلیں دی شان اے ،تقویٰ دنیا تے آخرت دی بھلائی دا سبب اے، حیا ایمان دی شاخ اے۔انہاں مسلماناں ُتے زور ݙتا جو ہمسائیں دا خیال رکھو، یتیماں، بیواَتے کمزور طبقیں نال ہمدردی اَتے شفقت ورتو ، ماء پیو نال ہمیشہ صلہ رحمی نال پیش آؤ اَتے ٻہوں ساری تعداد وِچ گناہیں دی معافی منڳدے رہو۔ انہاں آکھیے جو اللہ توں جنت اَتے جہنم توں نجات منڳو۔ انہاں آکھیے جو رسول اکرم ﷺ فرمائے: “اے ایمان آلے، اللہ دی عبادت ایویں کرو جیویں تساں اللہ کوں ݙیکھدے پیو، یا ول اللہ دی عبادت ایں طرحاں کرو جیویں اللہ تساکوں ݙیکھدا پئے ۔”انہاں آکھیے جو شیطان تساݙا کُھلا دشمن اے، ایں توں پرے رہو ۔ اللہ نیکی کرݨ اَتے برائی توں پرے رہݨ دا حکم ݙتے۔ دشمن کوں معاف کرݨ وی نیکی اے، نیکیاں برائیاں کوں مٹا ݙیندن اِیں واسطے نیکیاں دی ودھ توں ودھ کوشش کرݨی چاہیدی اے۔ نماز قائم کرو، اے اللہ اَتے بندے دے درمیان ہک بہترین رابطہ اے اَتے ساریں توں ودھ وچلی نماز دی حفاظت کرو۔ اللہ تعالیٰ فساد فی الارض توں سختی نال منع فرمائے۔انہاں دا آکھݨ ہئی جو انسان کوں باطنی بیماریاں توں بچݨا چاہیدے کیونکہ باطنی بیماریاں پاروں انسان اللہ دا قرب حاصل نی کرپیندا۔ رمضان دے روزے تہاݙے اُتے فرض کیتے ڳئن جیویں تہاݙیاں پچھلیاں اُمتاں اُتے فرض کیتے ڳئے ہن، روزے انسان کوں باطنی بیماریاں توں پاک کر ݙیندن۔خطبہ حج وِچ آکھیا ڳئے جو دین اسلام دے 3 درجے ہن جیندے وِچ ساریاں توں اُچا درجہ احسان اے، ݙوجھا درجہ ایمان دا اے جیڑھا جو زبان نال اقرار، دل نال یقین اَتے اعضاء نال عمل کرݨ اے، ایمان دیاں 70 توں ودھ شاخاں ہن، “لاالہ الااللہ” آکھݨ ساریاں توں اُچا اے اَتے رستے تے تکلیف ݙیوݨ آلی چیز کوں ہٹاوݨ ساریں توں تلواں درجہ ہے۔شیخ ڈاکٹر صالح بن عبداللہ آکھیے جو “اے ایمان آلے، عہد اَتے وعدے کوں پورا کرو، جݙاں وی ڳالھ کرو چنڳی ڳالھ کرو۔ اللہ صبر کرݨ آلیں کوں پورا ثواب عطا کریندے۔ اللہ دے شکر گزار لوکاں نال وعدہ اے جو جتنا شکر کریسن انہاں کوں ودھ نعمتاں نال نواز ݙیسی “۔امام کعبہ خطبہ حج وِچ فلسطین دے مسلماناں کیتے خصوصی دعا کریندے آکھیے جو “اے اللہ، فلسطین وِچ اساݙے بھراواں دا خیال رکھ، اساݙے فلسطینی بھراواں دی بُکھ، مصیبتاں اَتے تکلیفاں کوں ختم فرما۔ اے اللہ، فلسطین دے بے گھر لوکاں کوں آسرا ݙے، انہاں کوں امن عطا فرما، دشمناں دے شر توں نجات ݙے، اے اللہ، فلسطین وِچ اساݙے بھراویں کوں دشمن اُتے غالب فرما۔”مسلمان اللہ تے رسول ﷺدی تعلیمات تے عمل کرن اتے تقویٰ اختیار کرن، شیخ ڈاکٹرصالح بن عبد اللہ خطبہ حج اچ فلسطینی مسلماناں کیتے خصوصی دعا منڳی۔
