اسلام آباد۔9 جون(اے پی پی)مالی سال 2024-25 دے دوران حکومت تعلیم دے شعبے تے خصوصی توجہ ݙتی اے تاں جو پائیدار ترقی، انسانی سرمایہ اچ بہتری اتے مساوی تعلیمی مواقع ودھائے ونڄن۔ اقتصادی سروے رپورٹ دے مطابق جولائی توں مارچ 2025 دے دوران تعلیم تے مجموعی قومی پیداوار دا 0.8 فیصد خرچ کیتا ڳیا۔ اے شرح حکومت دی تعلیم کوں ترجیح ݙیوݨ دی پالیسی دا اظہار اے۔ رپورٹ اچ ݙسایا ڳئے جو اعلیٰ تعلیم کیتے 61.1 ارب روپے مختص کیتے ڳئے جیںدا مقصد یونیورسٹیاں، تحقیقی اداریاں اتے سکالرشپ پروگراماں کوں مزید مضبوط بݨاوݨ اے۔ خواندگی دی شرح اتے داخلے دی صورتحال تے رپورٹ دے مطابق ملک دی مجموعی شرح خواندگی 60.6 فیصد رہی۔ مرداں دی شرح خواندگی 68 فیصد رہی جڈاں جو عورتاں دی شرح خواندگی 52.8 فیصد ریکارڈ کیتی ڳئی جیڑھی عورتاں دی تعلیم دے میدان اچ مزید بہتری دی ضرورت کوں اڳونہا کریندی اے۔ پرائمری سطح تے سکولاں اچ داخلے دی تعداد 2 کروڑ 48 لکھ 30 ہزار (2.483 کروڑ) تئیں پڄ ڳئی اے جیڑھی بنیادی تعلیم تئیں رسائی اچ بہتری ݙکھیندی اے۔
