اسلام آباد۔9 جون(اے پی پی)حکومت دے مجموعی قرضیاں دا حجم جاری مالی سال دے پہلے 9 مہینیاں اچ 76007 ارب روپے تئیں پڄ ڳیا۔ قومی اقتصادی سروے 2024-25 دے مطابق مارچ دے اختتام تئیں حکومت دے مجموعی قرضیاں دا حجم 76007 ارب روپے تھی ڳیا جیںدے اچ ملکی قرضیاں دا حجم 51518 ارب روپے اتے بیرونی قرضیاں دا حجم 24489 ارب روپے ریکارڈ کیتا ڳیا۔ مالی سال دے پہلے 9 مہینیاں اچ سرکاری قرضیاں تے سود دی ادائیگی دا حجم 6439 ارب روپے ریکارڈ کیتا ڳیا جیںدے اچ 5783 ارب روپے ملکی اتے 656 ارب روپے بیرونی قرضیاں تے ادا کیتا ڳیا۔ ایں مدت اچ حکومت ہک ٹریلین روپے دی حکومتی سکیورٹیز دی خریداری کیتی۔ مالی سال دے پہلے 9 مہینیاں اچ 1.6 ٹریلین روپے دے شریعہ کمپلائنس سکوک جاری کیتے ڳئے۔ اقتصادی سروے دے مطابق ایں مدت اچ مجموعی طور تے 5.1 ارب ڈالر دی بیرونی معاونت موصول تھئی جیںدے اچ 2.8 ارب ڈالر کثیر الجہتی شراکت داراں اتے 0.3 ارب ڈالر ݙو طرفہ شراکت داراں ݙتے۔ نیا پاکستان سرٹیفکیٹ توں 1.5 ارب ڈالر اتے کمرشل بینکاں توں 0.56 ارب ڈالر دے قرضے حاصل کیتے ڳئے۔ آئی ایم ایف دے توسیعی فنڈ سہولت دے تحت پاکستان کوں 1.03 ارب ڈالر دی معاونت موصول تھئی۔
