تہران۔ 13 جون(اے پی پی)اسرائیل جمعہ کوں سویرے سویرے ایران تے وݙے حملے اچ ایندی جوہری اتے فوجی تنصیبات دے نال نال میزائل ٻݨاوݨ آلیاں فیکٹریاں کوں نشانہ ٻݨایا جیندے اچ ایران دے کئی فوجی کمانڈر اتے جوہری سائنسدان ماریے ڳئن، ایندے بعد ایران اسرائیل تے جوابی حملہ کیتے۔ جوابی حملے اچ ایران درجناں ڈرون اتے میزائل اسرائیل تے مارین۔ امریکی صدر ڈونلڈ ٹرمپ خبردار کیتے جو اسرائیلی حملے نال خطہ ہک وݙی اتے طویل جنگ دی ولھیٹ آ سڳدے۔ اسرائیلی وزیر اعظم بنجمن نیتن یاہو آکھیا جو اسرائیل آپݨے حملے اچ نتانز اچ ایران دے جوہری افزودگی دے پروگرام دے مرکز کوں نشانہ ٻݨائے۔ انہاں آکھیا جو ایران دے خلاف حملے اہداف دے مکمل تھیوݨ تئیں جاری رہسن۔ اسرائیلی ذرائع ابلاغ دے مطابق ایران ولوں گزریل کڄھ گھنٹیاں اچ اسرائیل دو ہک سو توں ودھ ڈرون اتے میزائل فائر کیتن اتے اسرائیل دیاں مسلح افواج انہاں کوں اہداف تئیں پڄݨ توں پہلے مار ݙھواوݨ کیتے کم کرینداں پئن۔ اسرائیلی ذرائع ابلاغ دا آکھݨ اے جو ایران دے فوجی اتے جوہری اہداف تے حملیاں اچ اسرائیلی فضائیہ دے 200 طیاریاں حصہ ڳھدے، حملیاں دے بعد ایران دے داراحکومت تہران اتے ٻئے کئی شہراں اچ دھماکیاں دیاں آوازاں سنݨیاں گئن۔ ایران دے سرکاری میڈیا دے مطابق ملک دیاں مسلح افواج دے چیف آف سٹاف میجر جنرل محمد باقری اسرائیلی حملے اچ مارے گئن، او ایران دی اعلیٰ ترین فوجی شخصیت ہن۔ حملے اچ پاسدارانِ انقلاب دے کمانڈر انچیف حسین سلامی وی مارے گئن۔ ایران دے جوہری سائنسدان اتے اٹامک انرجی آف ایران دے سابق سربراہ فردون عباسی اتے جوہری سائنسدان اتے آزاد یونیورسٹی دے صدر مہدی تہرانچی وی اسرائیلی حملیاں اچ مارے گئن۔ خاتم الابنیا ہیڈکوارٹر دے کمانڈر میجر جنرل غلام علی راشد وی مارے گئن۔ سرکاری میڈیا دا آکھݨ اے جو تہران اچ رہائشی عمارتاں کوں وی نشانہ ٻݨایا گیا جیندے اچ تریمتیں اتے بالاں سودھا کئی شہری مارے گئے۔ دارالحکومت اچ کئی ڄاہیں تے رہائشی عمارتاں کوں وی نقصان پڄیے اتے عام شہریاں دے مارے ونڄݨ اتے زخمی تھیوݨ دیاں خبراں ہین۔ ٻئے پاسو ایران دے سپریم لیڈر آیت اللہ علی خامنہ ای ہک بیان اچ آکھیا جو اسرائیل انہاں دے ملک تے حملہ کر تے آپݨے مقدر کوں تاریک اتے تلخ ٻݨآوݨ تے مہر ثبت کر ݙتی اے۔ اسرائیلی حملے دے بعد اردن اتے عراق آپݨیاں فضائی حداں بند کر ݙتن۔ سعودی عرب ایران تے اسرائیلی حملیاں دی مذمت کیتی اے۔ ایران دے دارالحکومت تہران دے تجریش ضلع اچ واقع ہسپتال اچ اسرائیلی حملیاں اچ زخمی تھیوݨ آلے 50 بندیاں کوں طبی امداد ݙتی ویندی پئی اے۔ امریکی صدر ہک بیان اچ آکھیا جو او ایران تے حملیاں اچ ملوث کائنی ٻھل ڄیکر ایران جوابی کارروائی کیتی تاں انہاں دا ملک اسرائیل دا دفاع کریسی۔ ایں دوران اقوام متحدہ دے سیکرٹری جنرل انتونیو گوتریش خطے دی کشیدگی اچ ودھارے دی مذمت کیتی اے ۔
